कन्ट्याक्ट ट्रेसिङ फितलो
पहुरा समाचारदाता
धनगढी, ११ बैशाख । सुदूरपश्चिम प्रदेशमे कोरोना भाइरसके रोकथामके लाग सक्रमितके सम्पर्कमे आइल व्यक्तिहे लक्षित करके करे पर्ना कन्ट्याक्ट ट्रेसिङके फितलो हुइटी रहल बा । भारतीय सीमानाका हुइटी लौटटी रहल व्यक्तिके सम्पर्कमे आइल कन्ट्याक्ट ट्रेसिङ प्रभावकारी हुई नइसेक्के सक्रमणके दर बढटी गैल स्वास्थ्यकर्मीके अनुभव बा ।
कैलालीके गौरीफन्टा सीमा नाकाके हेल्थ डेस्कमे खटल स्वास्थ्यकर्मी गणेश साउद सीमानाकासे भित्रना नागरिकके कन्ट्याक्ट ट्रेसिङ फितलो हुके संक्रमण दर बढल बटैलै । भारतसे निर्वाधरुपमे नेपाली ओ भारतीय नागरिक सीमानाका हुइटी नेपाल प्रवेश करटी रहल बटै । पछिल्का हप्तामे प्रदेशमे नयाँ सक्रमित ३६८ जाने पुगल बटै । अघिल्का हप्तामे १२३ सक्रमित फेला परल रहिट । शुकके एक्के दिनमे ९४ जाने सक्रमित ठपल रहिट । सक्रमितके दर बढटी जाँके प्रदेशमे जटिल अवस्थाके बिरामीफे बढटी गैल बटै ।
स्वास्थ्य निर्देशनालय दीपायलके तथ्याङके अनुसार सक्रिय संक्रमित बिरामी ५०९ पुगल बटै । उ मध्ये ७७ अस्पतालके आइसोलेशनमे ओ बाँकी स्थानीय तहके तथा होम आइसोलेशनमे रहल बटै । सघन उपचार कक्षमे १४ ओ भेन्टिलेरमे तीन उपचाररत रहल बटै ।
जिल्ला स्वास्थ्य कार्यालय कैलालीके प्रमुख लालबहादुर धाँमी भर सक्रमितके सम्पर्कमे आइल कन्ट्याक्ट ट्रेसिङके काम हुइटी रहल जानकारी डेलै । गौरीफन्टा सीमानाका हुइटी दैनिक कम्तीमेफे ५०० व्यक्ति स्वदेश लौटना करल बटै ।
भित्रना सक्कुहुनके एन्टिजेन परीक्षणः शुरुके कुछ हप्तामे सीमानाका हुइटी भित्रनामे जुरी रहल नइरहल जाँच करके शंकस्पद विल्गैना व्यक्तिके केल एन्टिजेन परीक्षण कैना करलमे पछिल्का दिनमे सक्कु व्यक्तिके एन्टिजेन परीक्षण कैना करल बा ।
यैसिन परीक्षणसे नतिजा ‘पोजेटिभ’ विल्गाइलहे धनगढी उपमहानगरपालिकाके कनरी क्षेत्रमे स्थापना करल आइसोलेशनमे रख्न करल बा । होम आइसोलेशनमे बैठे पर्ना अवस्थाके संक्रमितके भर स्वास्थ्य सतर्कतासम्बन्धी परामर्श डेहे होम आइसोलेशनमे पठैना करल बा ।
२६ सय ढेर कोरोना संक्रमित ठप्लै, १४ के मृत्यु
पछिल्का २४ घण्टामे देशभर २६ सय १९ जनहनमे कोरोनाभाइरस संक्रमण पुष्टि हुइल बा । ओस्टेक १४ के मृत्यु हुइल बा । स्वास्थ्य तथा जनसंख्या मन्त्रालयके अनुसार ८ हजार ६६८ जनहनमे परीक्षण करेबेर २६१९ जनहनमे संक्रमण पुष्टि हुइल हो । पीसीआर विधिसे ७ हजार ५२५ जनहनमे परीक्षण करेबेर २४८६ ओ एन्टिजेन विधिसे ११४८ जनहनमे परीक्षण करेबेर १३३ जनहनमे संक्रमण पुष्टि हुइल हो ।
यी संगे देशभर कोरोनाभाइरस संक्रमितके कुल संख्या २ लाख ९७ हजार ८७ ओ ठिक हुइलके कुल संख्या २ लाख ७७ हजार १२३ पुगल बा । हालसम मृतकके कुल संख्या ३१३६ पुगलफे मन्त्रालय जनैले बा । हाल देशभर सक्रिय संक्रमितके संख्या १६ हजार ८२८ पुगल बा ।
सुदूरपश्चिममे ठप ७२ जनहनमे कोरोना पुष्टि
सेती प्रादेशिक अस्पताल धनगढीके कोरोना प्रयोगशालामे करल परीक्षणसे सुदुरपश्चिम प्रदेशमे ठप ७२ जनहनमे कोरोना पुष्टि हुइल बा ।
शनिच्चर १८५ नमुनाके परिक्षण करेबेर ठप ७१ जनहनमे कोरोना पोजिटिभ पुष्टि हुइल हो । ११३ नमुना भर नेगेटिभ आइल सेती प्रादेशिक अस्पतालके सुचना अधिकारी दिलीपकुमार श्रेष्ठ जानकारी डेलै । सेती प्रादेशिक कोरोना अस्पतालमे ४ जाने भेन्टीलेटरमे १० जाने आइसियुमे,१० जाने अक्सिजनमे ओ १८ जाने सुधारोन्मुख हुइटी रहल श्रेष्ठ बटैलै ।
