‘तथ्यमे आधारित सत्य समाचार लिख्ना आग्रह’
पहुरा समाचारदाता
धनगढी, ११ बैशाख । आन्तरिक मामिला तथा कानून मन्त्री प्रकाशबहादुर शाह पत्रकारहुक्रनहे तथ्यमे आधारित सत्य बाट लिख्ना आग्रह करले बाटै ।
नेपाल पत्रकार महासंघ सुदूरपश्चिम प्रदेश समितिके शनिच्चरके धनगढीमे कार्यालय भवन उद्घाटन तथा पदभार हस्तान्तरण कार्यक्रमहे सम्बोधन कैटी मन्त्री शाह तथ्यमे आधारित रहीके सत्य बात लिख्ना आग्रह करल हुइट । उहाँ प्रेस स्वतन्त्रता कहटी किल ज्या पैना उहे नै लिख्ना आग्रह करल रहिट ।
‘पत्रकारहुक्रे तथ्यमे आधारित सत्य बात लिखे परल,’ मन्त्री शाह कहलै–‘इ नैहो किल प्रेस स्वतन्त्रता कहटी किल पत्रकारहुक्रे ज्या पैना उहे लिखे पैना हो, इहीसे समाजके प्रगति तथा समृद्धिमे नै मजा प्रभाव परठ् ।’
मन्त्री शाह मिडियाकर्मीनहे आवाज विहिनके आवाज बन्ना फेन आग्रह करल रहिट । उहाँ कहलै– ‘मिडियाकर्मी आपन हक अधिकारके लाग किल नैहोके, यहाँके जनता जो आवाज विहिन बाटै, उहाँहुक्रनके हक अधिकार तथा न्यायके लाग आवाज बने परल, कलम चलाइ परल ।’
यकर साथे मन्त्री शाह यहाँके पत्रकारहुक्रनके लाग पेशागत तथा भौतिक सुरक्षा सहित पत्रकारहुक्रनके दक्षता अभिवृद्धिके लाग सदैव सहयोग रहना प्रतिवद्धता जनाइल रहिट ।
कार्यक्रममे नेपाल पत्रकार महासंघ केन्द्रिय समितिके महासचिव रोशन पुरी श्रमजिवी पत्रकारहुक्रनके अवस्था दयनीय रहल बटाइल रहिट । उहाँ कोभिड–१९ के कारण टमान मिडिया बन्द हुइनाके साथे पत्रकारहुक्रे विस्थापित हुइ पुगल बटैलै । यकर लाग उहाँ बन्द मिडिया सञ्चालनके लाग ओ पत्रकारहुक्रनहे पुनःस्थापना लगायत ओइनके पेशागत सुरक्षाके लाग प्रदेश सरकारहे प्रदेश रजिस्टार स्थापना कैना आग्रह करल रहिट ।
नेपाल पत्रकार महासंघके केन्द्रिय सचिव हेमकर्ण विक पत्रकारहुक्रनके हकहित, पेशागत सुरक्षा लगायत पत्रकारहुक्रनहे व्यवसायिक बनाइक लाग ओ ओइनके दक्षता अभिवृद्धिके लाग प्रदेश सरकारसे आवयश्यक बजेट विनियोजन करे पर्ना आग्रह करल रहिट ।
प्रदेश सभा सदस्य तथा पूर्व सामाजिक विकास मन्त्री दीर्घ सोडारी समाजमे डबल मुद्धा उठान कैना पत्रकारहे कलम चलैना आग्रह करल रहिट ।
ओस्टके प्रदेश सभा सदस्य पुर्णा जोशी सूचना प्रवाहके लाग पत्रकारहे आपन पेशा ओ विचारमे तटस्थ रहन् आग्रह करल रही । यकर साथे उहाँ पत्रकारहुक्रनके लाग क्षमता तथा दक्षता अभिवृद्धि लगायत व्यवसायिक पत्रकारके रुपमे विकास कैना प्रदेश कार्य समितिहे अग्रसर हुइ पर्ना सुझाइल रही ।
कार्यक्रममे जिल्ला समन्वय समितिके प्रमुख सुर्यबहादुर थापा, वरिष्ठ पत्रकार चित्रांग थापा, मनमोहन स्वाँर, नेपाल पत्रकार महासंघ सुदूरपश्चिम प्रदेशके निवर्तमान अध्यक्ष अर्जुन शाह लगायत शुभकामना मनतब्य राखल रहिट ।
कार्यक्रममे नव निर्वाचित प्रदेश कार्यसमितिके पदाधिकारीनहे निर्वाचन संयोजक तथा वरिष्ठ पत्रकार चित्रांग थापा सपथ ग्रहण कराइल रहिट ।
१ करोडके अक्षयकोष स्थापना कैना घोषणा
नेपाल पत्रकार महासंघ सुदूरपश्चिम प्रदेशसे १ करोडके अक्षय कोष स्थापना कैना घोषणा करल बा ।
नेपाल पत्रकार महासंघ सुदूरपश्चिम प्रदेश समितिके शनिच्चरके धनगढीमे कार्यालय भवन उद्घाटन तथा पदभार हस्तान्तरण कार्यक्रममे नवनिर्वाचित अध्यक्ष योगेश रावल यहाँके डियाकर्मीहुक्रनके स्वास्थ्य उपचारमे सहजताके लाग उक्त अक्षय कोष स्थापना कैना उद्घोष करल हुइट । अक्षय कोष स्थापनाके लाग उहाँ १ लाख रुपैया फेन कोषमे जम्मा कैना उद्घोष करल रहिट ।
उहाँ १ बरस भित्रे उ कोष स्थापना कैना फेन प्रतिवद्धता जनाइल रहिट । यकर साथे अध्यक्ष रावल सपथ ग्रहण कैर्टी यहाँके संचारकर्मीहुक्रनके पेशागत ओ भौतिक सुरक्षाके लाग रत्तिभर पाछे नै हट्ना प्रतिवद्धता व्यक्त करल रहिट ।
