चार विद्यार्थीमे कोरोना डेखलपाछे कैलारीके विद्यालय बन्द

पहुरा समाचारदाता
हसुलिया, १२ वैशाख । कैलालीके कैलारी गाउँपालिकामे चार जाने विद्यार्थीनहे कोरोना संक्रमण हुइल बा । वडा नम्बर ५ स्थित जनकल्याण माध्यमिक विद्यालयके तीनसहित चार जाने विद्यार्थीनहे कोरोना पुष्टि हुइल हो । एक विद्यार्थी दुसर विद्यालयमे अध्ययनरत रहल जनाइल बा ।

उ गाउँपालिकामे चार विद्यार्थी ओ एक दम्पत्ति करके अँटवार छ जनहनमे कोरोना पुष्टि हुइल गाउँपालिकाके स्वास्थ्य शाखा प्रमुख वीरेन्द्र सापकोटा जानकारी डेलै । उहाँक अनुसार विद्यालयमे विद्यार्थी विरामी परल खबर आइलपाछे गाउँपालिकाके कार्यालय परीक्षणके लाग स्वास्थ्यकर्मी पठाइल रहे ।

जुरी आइल, रुघाखोकी लागल चार जाने विद्यार्थीके एन्टिजेन विधिसे स्वास्थ्य परीक्षण करेबेर चारु जनहनहे कोरोना संक्रमण पुष्टि हुइल सापकोटा बटैलै । उहाँ संक्रमण पुष्टि हुइल उ विद्यार्थीके सम्पर्कमे आइलके परीक्षण सोम्मार कैना जानकारी डेलै । संक्रमित विद्यार्थीमे जुरी ओ रुघाखोकी बाहेक और समस्या नइहुइल ओरसे औषधि डेहे ओइनहे होम आइसोलेसनमे बैठना सल्लाह डेहल सापकोटा जनैलै ।

‘यदि, ढेर समस्या हुइलेसे हमार गाउँपालिकाके आइसोलेसनमे रख्बी, उहाँ कहलै । ‘तत्कालहे घरमे बैठना सल्लाह डेले बटी ।’ ओस्टेक करके, जनकल्याण विद्यालय लग्गेक जबदहुवा गाउँके एक पुरूष ओ एक महिलाहे कोरोना सङ्क्रमण पुष्टि हुइल हो ।

सङक्रमण बढटी रहल कैलालीके सहरी क्षेत्रमे वैशाख पहिल सातासे विद्यालय बन्द करल रहे । मने, ग्रामीण क्षेत्रमे भर पढाई हुइटी आइल बा । विद्यालयके विद्यार्थीहे समेत कोरोना संक्रमण पुष्टि हुइलपाछे उ गाउँपालिकाके सक्कु विद्यालयमे १८ गतेसमके लाग वैकल्पिक विधिसे पठनपाठन कैना गाउँपालिका आग्रह करले बा ।

भौतिक रुपमे विद्यार्थी उपस्थित नइकराके शिक्षण क्रियाकलाप सञ्चालन करेक लाग विद्यालयहे सूचना पठाइल शिक्षा शाखा प्रमुख गणेश मिश्र जानकारी डेलै । उहाँ स्थिति सामान्य रहलेसे कक्षा ८ के परीक्षा भर पूर्व निर्धारित मितिमे सञ्चालन हुईना जनैलै ।