जेष्ठ नागरिक मिलन भवनके शिलान्यास
पहुरा समाचारदाता
धनगढी, १२ बैशाख । धनगढी उपमहानगरपालिका वडा नम्बर १६ के बेहडाबाबामे जेष्ठ नागरिक मिलन भवनके अँटवार शिलान्यास करल बा ।
धनगढी उपमहानगरपालिकाके नगरप्रमुख नृपबहादुर वड शिलान्यास करल हुइट । भवन धनगढी उपमहानगरपालिकाके लगानीमे निर्माण हुई लागल हो । भवनके शिलान्यास करटी नगरप्रमुख वड भवन निर्माण हुइलपाछे जेष्ठ नागरिकहुकनहे भेटघाट, छलफल कैना सहजुल हुइना बटैलै ।
जेष्ठ नागरिक मिलन भवनहे जेष्ठ नागरिकहुकनके गफगाफ कैना, भेटघाट कैना ठाउँके रुपमे विकास कैजाई नगरप्रमुख वड कहलै, ‘टबमारे जेष्ठ नागरिकमैत्री भवन निर्माण करे लागल हुई ।’
भवनमे धनगढी उपमहानगरपालिकाके २० लाख लगानी हुइटी रहल बा, धनगढी उपमहानगरपालिकाके डिभिजनल ईन्जिनियर डिजराज भट्ट कहलै, ‘ओकर १० प्रतिशत स्थानीयके योगदान हुई ।’
जेष्ठ नागरिक मिलन भवन बेहडाबाबा धामके लग्गे रहल ओरसे मन्दिरके दर्शन करेक लाग अइना जेष्ठ नागरिकहुकनहे समेत राहत पुग्न ईन्जिनियर भट्ट बटैलै ।
