बाँके ओ बर्दियामे निषेधाज्ञा
नेपालगंज, १३ वैशाख । कोरोना संक्रमण बह्रटी गैलपाछे बाँके ओ बर्दियामे सोम्मारसे एक अँठ्वारसे निषेधाज्ञा लागु हुइल बा । निषेधाज्ञा सोम्मारके मध्यरातसे लागु हुइल बा ।
इहीसे वैशाख ८ गतेसे १५ गतेसम बाँकेके नेपालगञ्ज उपमहानगर क्षेत्रभिट्टर किल लकडाउनके निर्णय करल रहे । संक्रमण फैलटी गैल ओरसे जिल्लाभर निषेधाज्ञाके निर्णय करल प्रमुख जिल्ला अधिकारी शिवराम गेलाल जानकारी डेलै ।
जिल्ला प्रशासन कार्यालय बाँकेके अनुसार सोम्मारके रात १२ बजेसे वैशाख २० गते रात १२ बजेसम निषेधाज्ञा लागु हुइना बा ।
निषेधाज्ञा अवधिभर एम्बुलेन्स, दमकल, शववाहन, सुरक्षाकर्मी ओ स्वास्थ्यकर्मीके गाडी किल सञ्चालन करे डेना निर्णय प्रशासनसे करले बा । ओस्टके स्वास्थ्य, विद्युत, दूरसञ्चार, खानेपानी, पेट्रोलियम पदार्थ, फोहोरमैला व्यवस्थापन, ग्यास, तरकारी, खाद्य पदार्थ, बैंकके एटिएम, औषधि पसल ओ हवाई सेवा फेन खुल्ला रहना बावै । बाँके ओ बर्दिया डुनु जिल्लाके सिमाना भारतसे जोरल बावै ।
