पवेरामे डेखापरल चितुवा नियन्त्रणमे
पहुरा समाचारदाता
पवेरा, १३ वैशाख । कैलाली जिल्लाके कैलारी गाउँपालिका वडा नम्बर ५ पवेरा गाउँमे डेखा परल चितुवा नियन्त्रणमे आइल बा ।
आज सकारे गाउँमे चितुवा डेखलपाछे इलाका प्रहरी कार्यालय हसुलिया, डिभिजन वन कार्यालय धनगढी ओ बर्दियाके बाघ नियन्त्रण टोली चितवाहे नियन्त्रणके लाग प्रयास जारी करले रहे ।
डिभिजन वन कार्यालय धनगढीके प्रमुख लोकराज दाहाल अथक प्रयासके बाबजुद चितवाहे नियन्त्रणमे लेहल बटैलैं ।
“चितवा गाउँमे आइल बा कना खबर पैटीकिल हम्रे उहाँ पुग्ली,” डिभिजन वन कार्यालय प्रमुख दाहाल कहलैं, “बर्दियासे बाघ नियन्त्रण टोली मगाके प्रयास करली, पहिल चो डर्टिङ्ग करेबेर मिस हुइल डुसरा पटकमे सफल हुइली, अब्बे चितवा नियन्त्रणमे आइल बा । ओकर अवस्था हेरके फेरसे होसमे नानके सुक्लाफाँटा राष्ट्रिय निकुञ्जमे छोरब ।”
चितवा घाहिल ओ आक्रमक अवस्थामे रहे, स्थानीयहुक्रे होहल्ला करल कारण नियन्त्रण कैना कर्रा हुइल रहे । सक्कारसे प्रयास करलपाछे मिन्हिजुनकिल नियन्त्रण करेसेकल उहाँ बटैलैं ।
एक ओर कोरोना संक्रमण बह्रटी रहल बेला गाउँमे चितुवा डेखलपाछे हजारौ मनैनके भीड सकारेसे चितुवा हेरे गैल स्थानीय तेजराम चौधरी बटैलैं । घाहिल अवस्थामे रहल चितुवा पवेराके धनीराम कठरियाहे आक्रमण करलपाछे उहाँ सामान्य घाहिल हुइल बटै ।
सम्बन्धित समाचार
