कैलाली ओ कञ्चनपुरमे रातके नेङघुममे रोक
पहुरा समाचारदाता
धनगढी, १३ वैशाख । कैलाली ओ कञ्चनपुरममे अत्यावश्यक कामबाहेक रातके समयममे नेंङगघुममे स्थानीय प्रशासन रोक लगैले बा ।
सोम्मार धनगढीमे बैठल अन्तर जिल्ला कोभिड–१९ संकट व्यवस्थापन केन्द्रके सुझावके आधारमे दुनु जिल्लामे रात ८ बजेसे सकारे ५ बजेसम अत्यावश्यक काम बाहेक नेंङगघुममे रोक लगाइल हो ।
जिल्ला प्रशासन कार्यालय कैलालीके सूचना अधिकारी शिवराज जोशी अत्यावश्यक कामबाहेक जिल्लाभर कौनोेफे स्थानममे रातके समयमे नेंङघुम करे नइपैना जानकारी डेलै । ओकर अतिरिक्त और सयममेफे बिना काम बाहेर नइनिकरना सार्वजनिक रुपमे आह्वान कैना जोशी बटैलै ।
अन्तर जिल्ला संकट व्यवस्थापन केन्द्रके सुझावअनुसार दुनु जिल्लामे होटल तथा रेष्टुरा सकारे ८ बजेसे साँझ ८ बजेसम केल सञ्चालन कैना, और समयमे होम डेलिभरी कैना निर्णय समेत करल बा ।
बैंक तथा वित्तीय संस्थामे भिडभाड हुई नइडेना उद्योग, कलकारखाना, निजी तथा सार्वजनिक निर्माणके काममे लगाइल श्रमिकहे जनस्वास्थ्यके मापदण्ड पालना करे लगैना निर्णयफे दुई जिल्लाका प्रशासन कार्यालय करले बटै ।
शिक्षण संस्था वैशाख ३१ सम बन्द
कैलाली ओ कञ्चनपुर जिल्लामे मंगरसे लागु हुइना करके शिक्षण संस्था समेत बन्द कैना निर्णय करल बा । उ निर्णयअनुसार जिल्लास्थित विद्यालय, कलेज, ट्युसन सेन्टर,तालिम केन्द्र लगायतके सक्कु शिक्षण संस्था मंगरसे बैशाख ३१ गतेसम बन्द रही
