वैशाख मसान्तभर शैक्षिक संस्था बन्द
पहुरा समाचारदाता
धनगढी, १४ बैशाख । कोरोना संक्रमण दर बह्रटी रहल कैलाली, कञ्चनपुरमे वैशाख ३१ गतेसम सम्पूर्ण शैक्षिक संस्थान सञ्चालन नैहुइना निर्णय करल बा ।
डुनु जिल्लाके प्रमुख जिल्ला अधिकारीसहित सोम्मार बैठल सरोकारवालाके संयुक्त बैठकसे संक्रमणहे मध्यनजर कैके शैक्षिक संस्था, ट्युसन सेन्टर, तालिम केन्द्र सक्कु मंगरके रोजसे लागू हुइना मेरके ३१ गतेसम बन्द रहना निर्णय करल हो ।
ओस्टके, डुनु जिल्लामे सोम्मारसे रातसे हिडडुल कैनामे बन्देज करल बा । बैठकसे रात ८ बजेसे सकारे ५ बजेसम अत्यावश्यक कामबाहेक रातके हिडडुल कैनामे बन्देज करल हो । ओस्टके, अन्य समयमे फेन नागरिकहे अनावश्यक रुपमे हिडडुल नैकैना आग्रह करल बा ।
बैठकसे डुनु जिल्लामे रहल सक्कु स्थानीय तहसे इहीसे आघे सञ्चालन करल क्वारेन्टाइन ओ आइसोलेसनहे व्यवस्थित कैके सञ्चालनके लाग स्थानीय तहहे अनुरोध कैना निर्णय करल बा ।
गौरीफन्टा प्रवेश बिन्दु होके घर अउइया नेपालीनके स्वास्थ्य कार्यालय कैलाली ओ गड्डा चौकी प्रवेश बिन्दु होके आइल नेपालीके जिल्ला स्वास्थ्य कार्यालय कञ्चनपुरसे ज्वरो मापन, कोरोना परीक्षण करे पर्ना निर्णय समेत करल बा ।
नेपाल प्रवेश करलहे जिल्लागत रुपमे छुट्टयाके सम्बन्धित जिल्लाके स्थानीय तहमे पठैना जनाइल बा । ओस्टके, सीमावर्ती क्षेत्रमे संक्रमण तीव्र रुपमे फैलटी रहल ओरसे नाकामे निगरानी कैनाके साथे किनमेलके लाग आवतजावत करे नैडेना निर्णय हुइल बा ।
नेपालीके प्रभावकारी रुपमे स्वास्थ्य परीक्षणके लाग सामाजिक विकास मन्त्रालयसंग थप जनशक्ति माग कैना निर्णय हुइल जिल्ला प्रशासन कार्यालय कैलालीके सूचना अधिकारी शिवराज जोशी जानकारी डेलै ।
ओस्टके, बैठकसे कैलालीके हकमे गौरीफन्टानाका होके नेपाल प्रवेश करुइया नागरिकहुक्रनके लाग आवश्यक पर्ना होल्डिङ सेन्टरके हकमे गौरीफन्टा नाका लग्गे पर्ना उपयुक्त, स्थान उपलब्ध करैना धनगढी उपमहानगरपालिकाहे अनुरोध कैना ओ कञ्चनपुरके हकमे गड्डाचौकी नाका होके नेपाल प्रवेश करुइया नागरिकहुक्रनके लाग आवश्यक पर्ना होल्डिङ सेन्टरके हकमे भिमदत्तनगरपालिकाहे उपयुक्त स्थानमे होल्डिङ सेन्टर स्थापना कैके भिमदत्तनगरपालिकाहे अनुरोध कैना निर्णय हुइल बा ।
डुनु जिल्लाके सक्कु शैक्षिक संस्था, ट्युसन सेन्टर, तालिम केन्द्र वैशाख ३१ गतेसमके लाग बन्द कैना निर्णय हुइल जोशी जानकारी डेलै । ओस्टके, तोकल मापदण्ड पूरा कैके सवारी साधन जोर बिजोर प्रणालीमे सञ्चालन कैना निर्णय हुइल बा । जोखिम बह्रटी गैल ओरसे दैनिक नित्य, पूजाआजाबाहेक धार्मिक कौनो फेन कार्यक्रम करे नैपैना बैठकसे निर्णय करल बा । सवारी साधन सञ्चालनमे जोर बिजोर प्रणाली कडाइके साथ लागू कैना जनाइल बा ।
ओस्टके, सरकारी कार्यालय, बैंक तथा वित्तीय संस्था लगायतमे स्वास्थ्यके मापदण्ड पूर्ण रुपमे पालना कैके सेवा प्रवाह कैना बैठकसे निर्णय करल बा । होटल रेष्टुरेन्ट रात ८ से सकारे ८ बजेसम बन्द कैना बैठकमे निर्णय हुइल बा ।
ओस्टके, कैलाली ओ कञ्चनपुरमे कोभिड जोखिमके विश्लेषण कैके स्थानीय तह ओ सरोकारवालासंग आवश्यक समन्वय कैके रणनीति बनाके कार्यान्वयन कैना निर्णय करल जोशी जानकारी डेलै । निर्णयके पूर्ण परिपालना नैकरलमे कानून बमोजिम कारबाही कैना जनाइल बा ।
ओस्टके, उद्योग, कलकारखाना सञ्चालन कैना ओ निजी तथा सार्वजनिक निर्माण क्षेत्रमे काम कैना कामदारहे आवश्यक स्वास्थ्य सुरक्षाके मापदण्ड पूरा कैके काममे लगैना व्यवस्था करे पर्र्ना निर्णय करल बा ।
ओस्टके, सम्बन्धित उद्योग, कलकारखानासे आपन क्षेत्रभिट्टर आवश्यक पर्ना क्वारेन्टिन, आइसोलेसन पूर्वाधारके प्रबन्धसमेत करे लगैना बैठकसे निर्णय करल बा । बैंक तथा वित्तीय संस्था आवश्यक सुरक्षा मापदण्ड पूरा कैके नेपाल राष्ट्र बैंकके निर्देशन बमोजिम सञ्चालन करे पर्ना निर्णय करल बा ।
