कोरोनासे सजकता अपनैना अपिल

पहुरा समाचारदाता
धनगढी, १९ बैशाख । धनगढी उप–महानगरपालिकासे कोरोना संक्रमणसे बाँचेक लाग सजकता अपनैना अपिल करले बा ।

नयाँ भेरिएन्ट सहितके कोरेना भाइरसके संक्रमित धनगढीमे बढटी ओरसे सजकताके लाग सक्कुहुनहे अनुरोध करल बा । कोरोना संक्रमणके जोखिमसे बाँचेक लाग सामाजिक एवम् भौतिक दुरी कायम रख्ना, मास्कके अनिवार्य प्रयोग कैना, साबुनपानीसे हात धुइना सर्वसाधारणममे अपिल करल बा । जुरी अइना, मुरी बठैना, हातगोरके जोर्नी बठैना, सुख्खा खोकी लग्ना हुइलेसे स्वास्थ्यकर्मीके परामर्श लेना धनगढी उप–महानगरपालिका आव्हान करले बा ।

भारत तथा टिसरा मुलुकसे आइलहुकनहे अनिवार्य होम क्वारेन्टीनमे बैठना अनुरोध करल बा । नगरप्रमुख नृपबहादुर वड ओ उप–प्रमुख सुशीला मिश्र भट्टसे प्रकाशित करल अपिलमे स्थानीय प्रशासनसे जारी करल निषेधाज्ञाके पालना कैना सक्कुहनमे अनुरोध करल बा ।
निषेधाज्ञाके फाईदा उठैटी कृतिम अभाव सिर्जना नइकैना, कालोबजारी नइकैना तथा गुणस्तरहिन बस्तु बेचबिखन नइकैना अनुरोध करल बा । गलत करल पैलेसे कानून अनुसार कार्वाही कैना बटायल बा ।