बालिकाहे युवाके समूहसे पेट्रोल छिट्के आगी लगागिल

बाजुरा, २१ वैशाख । बाजुराके त्रिवेणी नगरपालिका–९, मलालगाउँमे १४ वर्षिया बालिकाहे तीन युवाहुकनके समूह पेट्रोल छिट्के आगी लगाके घाहिल बनैले बाटैं । घटनापाछे तीनु जाने फरार रहल प्रहरी जनैले बा ।

ओहे नगरपालिका–८, कालापानीके सुमन गिरीसहित तीन जाने बैशाख १९ गते रात उ बालिकाउप्पर पेट्रोल छिट्के आगी लगाइल प्रहरीके अनुसन्धानसे खुलल बा । आगी लागके बालिकाके कपडा जलल बा कलेसे उहाँ घाहिल हुइल बाटी ।

त्रिवेणी नगरपालिका–८, पन्तालीके पीडित बालिकाके अभिन जिल्ला अस्पताल बाजुरा नानके उपचार करल बा । जिल्ला प्रहरी कार्यालय बाजुराके प्रमुख प्रहरी नायब उपरीक्षक मदनजीत महराके अनुसार आगी लागके बालिका सख्त घाहिल हुइल बाटी । साथे घटनापाछे फरार युवाहुकनहे प्रहरी खोजी जारी रहल बटैलै ।

रातके गाउँमे भ्वाज हेरे गिल बेलामे बालिकाहे पेट्रोल छिट्के आगी लगाइल प्रहरीके अनुसन्धानसे खुलल बा । गिरीसहित तीनुजहनहे पक्राउ करके मुलुकी अपराध संहिता १९२ के ‘क’ अनुसार मुद्दा चलैना प्रहरी प्रमुख महरा बटैलैं ।