युनिक नेपाल लघुवित्त संस्था अन्तर्राष्ट्रिय स्तरके गुणस्तरीय संस्थाके रुपमे सम्मानित

पहुरा समाचारदाता
बाँके, २५ वैशाख । बाँके कोहलपुरस्थित युनिक नेपाल लघुवित्त वित्तीय संस्था लिमिटेड ग्राहक सदस्य सुरक्षणमे अब्बल संस्थाके रुपमे सूचीकृत हुइल बा ।

स्मार्ट क्याम्पियनसे निर्धारण करल ग्राहक सुरक्षणके सात सिद्धान्त ओ १९२ मानक यी वित्तीय संस्था पूर्ण रुपमे पालना करल कटी स्मार्ट सर्टिफिकेट (प्रमाणपत्र) से सम्मानित हुइल हो ।
यिहिनसे यी वित्तीय संस्था अन्तर्राष्ट्रिय स्तरके मापदण्ड पूरा करल विश्वके उत्कृष्ट संंस्थाके सूचीमे सूचीकृत हुइल विश्वमे एक गुणस्तरीय सेवासुविधा प्रदान करना अव्वल वित्तीय संस्थाके रुपमे पहिचान कायम हुइल बा ।

स्मार्ट क्याम्पियन अन्तर्राष्ट्रियस्तरके सर्टिफिकेट (प्रमाणपत्र) हो । यि ग्राहक संरक्षणके विश्वव्यापी सिद्धान्तहे जोर डेले रहठ । विशेषकरके यी सेवाग्राहीस दस्यहुकनहे अधिककर्जा भार हुइनासे बचैना, वित्तीय सेवा निर्माण, परिमार्जन तथा वितरणमे उपयुक्त ओ प्रभावकारी प्रक्रिया अवलम्बन करना, सेवाके मूल्य निर्धारण करके जिम्मेवार बन्ना, वित्तीय सेवा प्रवाह करेबेर लग्ना शुल्क तथा मूल्यबारे पारदर्शिता कायम करना, सदस्यहुकनसँग सम्मानजनक व्यवहार करना, सदस्यहुकनके तथ्यांक तथा सूचना गोप्य ढरना ओ सदस्यहुकनके गुनासो सुनुवाई संयन्त्र चुस्त ओ दुरुस्त बनैना बाटमे जोर डेहठ । यी सब सिद्धान्त युनिक वित्तीय संस्थासे पूरा करल स्मार्ट क्याम्पियनके ठहर रहल बा । सेवाग्राही सदस्यहुकनहे बिना कौनो क्षति वा हानी नोक्सानी नैपुगाके सेवाप्रवाह करे परठ कना स्मार्ट क्याम्पेनके मुख्य मान्यता रहल बा ।

सदस्य सुरक्षणके लाग अइसिक विभुषित हुइनामे युनिक नेपाल लघुवित्त वित्तीय संस्था नेपालके पहिल वित्तीय संस्था बनल बा । यी प्रमाणपत्रके समयावधि ४ वर्षक बा । चार वर्षपाछे फेनसे यी सर्टिफिकेसन कायम करेक लाग वित्तीय संस्थासे उ सात सिद्धान्तहे पालना करल नैकरल प्रमाणीकरण कराइ परठ ।

अन्तर्राष्ट्रियस्तरके स्मार्ट सर्टिफिकेट प्राप्त करना सफल हुइलमे खुशी व्यक्त करटी यी वित्तीय संस्थाके कार्यकारी निर्देशक डा. गोपाल दहित यी नेपालके लघुवित्त इन्डष्ट्रीके लाग एक भारी उपलब्धी रहल बटैले बाटैं । उहाँ, स्मार्ट सर्टिफिकेट पाके हमारमे थप जिम्मेवारी बह्रल महसुस हुइल प्रतिक्रिया डेलैं ।

युनिक वित्तीय संस्था सन् २०१५ सालसे सदस्य सुरक्षणमे स्मार्ट सर्टिफिकेट पाइक लाग निरन्तर प्रयास करटी आइल रहे । यी ऐतिहासिक सफलता प्राप्त करना सहयोग करुइया सक्षम च्यालेन्ज फण्ड, गुड रिटर्न ओ एमक्रिल संस्थाप्रति युनिक परिवार हृदयसे आभार प्रकट करटी आगामी दिनमे ग्राहक संरक्षणके ७ सिद्धान्तहे प्रभावकारी कार्यान्वयन करना दृढ अठोटके साथ आघे बह्रना वित्तीय संस्थाके कार्य योजना रहल कार्यकारी निर्देशक डा. गोपाल दहित जानकारी डेलैं ।

स्मार्ट क्याम्पेन विश्वके सब मनैन्हे वित्तीय सेवा उपभोग करना ओ अर्थ व्यवस्थामे भाग लेके अपन जीवनस्तरमे सुधार करना सक्षम बनैना उद्देश्यसे विश्वभरके कम आय रहल व्यक्तिहुकनके लाग समावेशी वित्तीय प्रणालीहे आघे बह्रैना अनुसन्धान ओ वकालत करठ ।

हालसममे विश्वके ४० देशके १३५ ठो वित्तीय संस्था सकल यी स्मार्ट सिर्टिफिकेट प्राप्त करले बाटैं । स्मार्ट क्याम्पेनके मुख्य कार्यालय अमेरिकाके वासिंगटन डिसीमे बा ।