गण्डकीके मुख्यमन्त्री गुरुङसे राजीनामा, प्रदेश प्रमुखसे नयाँ सरकार गठन कैना आह्वान
पोखरा, २६ वैशाख । गण्डकी प्रदेशके मुख्यमन्त्री पृथ्वीसुब्बा गुरुङ पदसे राजीनामा डेले बाटैं । उहाँविरुद्ध प्रदेश सभामे दर्ता हुइल अविश्वास प्रस्तावमे काल्ह (सोम्मार) मतदान हुइना तय हुइल रहे ।
गण्डकी प्रदेशके मुख्यमन्त्री पृथ्वीसुब्बा गुरुङ आज पदसे राजीनामा डेले बाटैं । उहाँ प्रदेश प्रमुख सीताकुमारी पौडेल समक्ष राजीनामा बुझाइल हुइट ।
मुख्यमन्त्रीविरुद्ध सोम्मर अविश्वास प्रस्तावमे मतदानके प्रक्रिया सुरु हुइटेहे । ओकर आघेक दिन मुख्यमन्त्री राजीनामा डेहल हुइट ।
प्रदेश प्रमुख पौडेल राजीनामा डेहल ओरसे हालसम उहाँक नेतृत्वमे रहल मन्त्रिपरिषद्से करल कामके लाग धन्यवाद डेले बाटी । साथे औरे मन्त्रिपरिषद् गठन नैहुइटसमके लाग संविधानके धारा १६९ के उपधारा ३ बमोजिम मौजुदा मन्त्रिपरिषद्से कार्य संचालन करना ओ संविधानके धारा १६८ के उपधारा २ बमोजीम ३ दिनभित्तर सरकार गठनके आव्हान करले बाटी ।
मुख्यमन्त्रीविरुद्ध काँग्रेस, माओवादी केन्द्र ओ जनता समाजवादीके २८ सांसदसे बैशाख २ मे अविश्वास प्रस्ताव दर्ता हुइल रहे । मने अपनविरुद्ध अविश्वास प्रस्ताव आइ लागल पटा पाइलपाछे सरकार बैशाख १ के मध्य रातसे चालु हिउँदे अधिवेशन अन्त्य करडेले रहैं । अविश्वास प्रस्ताव दर्ता करल दिन विपक्षी मोर्चासे विशेष अधिवेशन मग्टी प्रदेश प्रमुख समक्ष समावेदन करले रहे । ओहे समावेदनके आधारमे तत्कालीन प्रदेश प्रमुख अमिक शेरचन बैशाख १३ मे विशेष अधिवेशन बोलैले रहैं ।
अविश्वास प्रस्तावउप्पर बैशाख १५ मे मतदान हुइना कार्यसूची रहलमे राष्ट्रिय जनमोर्चाके सांसद खिमविक्रम शाही हटाइल कटी सचेतक पियारी थापा निवेदन डहेलपाछे सभामुख नेत्रनाथ अधिकारी अधिवेशन अनिश्चितकालीन स्थगित करले रहैं । उपाछे सोम्मारके अविश्वास प्रस्तावउप्पर मतदान करे डेना तोकल रहे ।
