इजरायल ओ प्यालेस्टाइनबीच फेन द्वन्द्व चट्कलः ९ बालबालिकासहित कम्तीमे २० जाने मुलै
काठमाडौं, २८ वैशाख । इजरायल ओ प्यालेस्टाइनके सीमामे फेर हिंसा चट्कल बा । सोम्मार रात इजरायलसे करल हवाई आक्रमणसे ९ जाने बालबालिकासहित कम्तीमे २० जाने नागरिक मरल गाजाके स्वास्थ्य अधिकारी बटैले बाटैं ।
सोम्मार रात प्यालेस्टाइनके विद्रोही समूहके हमाससे जेरुसेलमलग्गे रकेट प्रहार करलपाछे इजरायल जवाफी कारबाही करल दाबी करले बा । गाजामे रहल हमासके सैन्य अंगामे इजरायली सेना आक्रमण करले बा ।
इजरायलके प्रधानमन्त्री बेन्यामिन नेतान्याहुले हमास ‘रेड लाइन’ नाघके आक्रमण करल बटैले बाटैं । सन् २०१४ के युद्धपाछे पहिलचो हमाससे रेड लाइन नाघल फेन उहाँ दाबी करले बाटैं ।
सोम्मार रातभर हमास रकेट प्रहार करना ओ इजरायली सेनाके ओरसे हवाई आक्रमण हुइल अन्तर्राष्ट्रिय सञ्चारमाध्यम उल्लेख करले बा । गाजा सहरमे रातभर विस्फोटके भारी आवाज सुनल फेन बटागिल बा । इजरायली सेना हमास १५० से ढेर रकेट प्रहार करल आरोप लगैले बा । कुछ रकेटहे भर क्षेप्यास्त्र प्रतिरक्षा प्रणालीसे निष्क्रिय बनाइल उ बटैले बा ।
अमेरिकी विदेशमन्त्री गाजासे इजरायलओर लक्षित करके हुइटीरहल रकेट आक्रमण तत्काल रोकरेपना बटैले बाटैं । उहाँ दुनु पक्षहे तनाव कम करना डगरमे कदम चल्न फेन आग्रह करले बाटैं ।
पाछेक कुछ दिनसे जेरुसेलममे हिंसा भड्कटी बा । जेरुसेलमस्थित अल अक्सा मस्जिदमे जैना प्रतिबन्ध लगाइलपाछे प्यालेस्टाइनके नागरिक क्रुद्ध हुइल बाटैं । यी मस्जिदहे इस्लाममे तेसर पवित्र स्थान मानजाइठ । यी यहुदीहुकनके फेन पवित्र धार्मिक स्थलके रुपमे रहल बा ।
प्यालेस्टाइन रेड क्रेसेन्ट सोसाइटीके अनुसार इजरायली प्रहरीसँगके झडपमे ३ सयसे ढेर घाहिल हुइल बाटैं । सोम्मार ‘जेरुसेलम दिवस’ मनाइबेर हिंसा भड्कल हो । सन् १९६७ के अरब–इजरायल युद्धपाछे पूर्वी जेरुसेलमउप्पर कब्जा करल सम्झनामे सोम्मार जेरुसेलम दिवस मनाइल रहे ।
सन् १९६७ के मध्यपूर्वके युद्धपाछे इजरायल पूर्वी जेरुसेलमउप्पर कब्जा करले रहे । उपाछे उ पूरा जेरुसेलमहे अपन राजधानी दाबी करटी आइल बा । मने अन्तर्राष्ट्रिय समुदाय भर यिहिनहे नैमानठ । प्यालेस्टाइन भर पूर्वी जेरुसेलमहे भविष्यके एक सार्वभौम ओ स्वतन्त्र मुलुकके राजधानीके रुपमे लेटि आइल बा ।
यिहे विषयमे प्यालेस्टाइन ओ इजरायलबीच विवाद रहटी आइल बा कलेसे बेरबेर यि युद्धके रुप लेले बा । सन् २०१४ के जुलाईसे अगस्टके बीचमे हुइल द्वन्द्वमे २२५१ प्यालेस्टाइनी मरल रहैं । उमध्ये १४६२ टे सर्वसाधारण रहैं । अस्टेक इजरायलके ६ सर्वसधारणसहित ६७ जाने सैनिक मरल रहैं ।
– एजेन्सी
