चार नेताउप्पर करल कारबाही फिर्ता लेना एमालेके निर्णय

काठमाडौं, ३० वैशाख । नेकपा एमाले चार नेताउप्पर करल कारबाही फिर्ता लेले बा । प्रधानमन्त्री निवास बालुवाटारमे बैठल बैठकसे माधवकुमार नेपाल, भीम रावल, घनश्याम भुसाल ओ सुरेन्द्र पाण्डेउप्पर करल कारबाही फिर्ता लेना निर्णय करल हो । पार्टी एकताहे ध्यानमे ढरके यी निर्णय लेहल स्थायी कमिटी सदस्य विष्णु रिमाल जानकारी डेले बाटैं ।

पुनस्र्थापित एमालेके अध्यक्ष केपी शर्मा ओली २८ फागुनमे अपन पक्षके नेताहुकनके किल बैठक ढरके विधान संशोधन करना, केन्द्रीय सदस्यहुक्रे थप्ना ओ माधव नेपाल समूहके नेताहुकनके जिम्मेवारी छिन्ना निर्णय करलपाछे नेपाल समूहसे वैशाख ४÷५ मे राष्ट्रिय कार्यकर्ता भेला बोलैले रहे । भेलाके लाग अगुवाइ करल कटी ७ चैतमे बैठल ओली पक्षके केन्द्रीय कमिटी बैठकसे चार नेताहे स्पष्टीकरण पुछ्ले रहे । नेताहुकनके डेहल जवाफ चित्तबुझ्ना नैहुइल कटि उहाँहुकनहे ६ महिना पार्टी सदस्यसे निलम्बन करले रहे ।

कारबाही फुकुवाके निर्णय करनाआघे एमाले महासचिव विष्णु पौडेल नेता नेपालसँग छलफल करले रहैं । कारबाही फुकुवापाछे अध्यक्ष केपी शर्मा ओली ओ माधव नेपालबीच टेलिफोन वार्ता हुइल रहे । ओली फोन करके भेट्ना प्रस्ताव करल नेता सुवास नेम्वाङ जानकारी डेलैं ।

आवश्यक निर्णय लेना अधिकार अध्यक्ष ओलीहे

प्रधानमन्त्री केपी शर्मा ओली गैल सोम्मार संसदमे विश्वासके मत लेहेबेर नेपाल पक्षके सांसदहुक्रे अनुपस्थित हुके असहयोग करलपाछे ओली पक्षसे थप कारबाही करना विश्लेषण हुइटी आइल रहे ।

एमालेके प्रवक्ता प्रदीप ज्ञवाली फेन पार्टी एकताके रक्षाके लाग विगतके सब बाटहे बिस्राके आघे बह्रना निर्णय हुइल ओ नेपाल, रावल, भुसाल ओ पाण्डेउप्परके कारबाही फुकुवा करल जानकारी डेलैं ।

कारबाही फुकुवाके निर्णयहे नेपाल पक्षके नेता योगेश भट्टराईसे सकारात्मक रुपमे लेहल प्रतिक्रिया डेले बाटैं ।

एमाले बैठकसे पार्टीभित्तर ओ राष्ट्रिय राजनीतिमे विकसित नयाँ परिस्थितिके सन्दर्भमे आवश्यक निर्णय लेना अधिकार अध्यक्ष केपी शर्मा ओलीहे प्रत्यायोजनसमेत करले बा ।

बैठकसे कोरोनाविरुद्धके लराइँमे राज्यके सक्कु शक्ति परिचालित करना ओ मित्र राष्ट्रसे आवश्यक सहायता जुटैना थप कूटनीतिक पहल करना सरकारहे सुझावसमेत डेले बा ।