कैलालीमे थप ४ सय ३३ संक्रमित, ८ के मृत्यु
धनगढी, ३१ वैशाख । कैलालीमे एक्के दिन आजसम्मके उच्च थप ४ सय ३३ जहनमे कोरोना भाइरसके संक्रमण पुष्टि हुइल बा कलेसे ८ जानेक मृत्यु हुइल बा ।
सेती प्रादेशिक अस्पतालके प्रयोगशालामे १ हजार २ सय ३ जहनके परीक्षणमे थप पाँच सय ३४ जानेमे संक्रमण पुष्टि हुइल सूचना अधिकारी दिलिपकुमार श्रेष्ठ जानकारी डेलैं । उमध्ये कैलालीके किल चार सय ३३ जाने रहल श्रेष्ठ बटैलैं ।
धनगढी उपमहानगरपालिकाके २५ ओ चार सय ८ जाने अन्य टमान स्थानीय तहके रहल उहाँ बटैलैं । बिटल २४ घण्टामे कैलालीमे थप ८ जहनके मृत्यु हुइल बा ।
सेती प्रादेशिक अस्पताल ओ मातहतके कोभिड अस्थायी अस्पतालमे उपचाररत कैलालीके ५, कञ्चनपुरके २ ओ दार्चुलाके १ जहनके मृत्यु हुइल हो । कैलालीके धनगढी उपमहानगरपालिका–२ के ३३ वर्षिय पुरुष, वडा नम्बर ४ के ५१ ओ ५६ वर्षिय पुरुष, गोदावरी नगरपालिका–२ के ७३ वर्षिय पुरुष, लम्कीचुहा नगरपालिका–७ के ४५ वर्षिय पुरुषके मृत्यु हुइल श्रेष्ठ जानकारी डेलैं ।
कञ्चनपुरके पुनर्वास नगरपालिका–६ के ३८ वर्षिय महिला, बेलौरी नगरपालिका–११ के ३८ वर्षके पुरुष ओ दार्चुलाके मार्मा गाउँपालिका–५ के ४० वर्षिय पुरुषके फेन उपचारके क्रममे मृत्यु हुइल उहाँ बटैलैं ।
सेती प्रादेशिक अस्पतालसे २४ घण्टामे कोरोना जितके २ जाने घर लौटल बाटैं । अस्पतालमे अब्बे ९८ जाने संक्रमितके उपचार हुइटा । उमध्ये १६ जाने आईसीयू, २ जाने भेन्टिलेटर, ८० जाने अक्सिजन सर्पोट ओ २ जानेहे आवश्यकताअनुसार अक्सिजन डेना काम हुइटीरहल अस्पताल जनैले बा ।
