सेती प्रयोगशालामे करल परीक्षणमे ५५५ मे कोरोना संक्रमण पुष्टि
धनगढी, १ जेठ । धनगढीस्थित सेती प्रादेशिक अस्पतालके प्रयोगशालामे करल परीक्षणमे आज (शनिच्चर) ५ सय ५५ जहनमे कोरोना भाइरसके संक्रमण पुष्टि हुइल बा । बिटल २४ घण्टामे सेती प्रादेशिक अस्पतालके प्रयोगशालामे ८ सय ३५ नमूना परीक्षण करेबेर ५ सय ५५ जहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलैं ।
उहाँक अनुसार धनगढीके २ सय ७२ जाने, धनगढीबाहेक कैलालीके २ सय ६२ जाने ओ अन्य जिल्लाके २० जहनमे संक्रमण पुष्टि हुइल बा । हाल अस्पतालमे १ सय ८ जाने कोरोना संक्रमितके उपचार हुइटीरहल सूचना अधिकारी श्रेष्ठ बटैलैं ।
जोनमध्ये १ जाने भेन्टिलेटरमे, १४ जाने आइसियूमे, ९० जाने अक्सिजन सपोर्टमे उपचाररत बाटै कलेसे ४ जानेक अवस्था सामान्य रहल अस्पताल जनैले बा । पाछेक २४ घण्टामे सेती अस्पतालसे कोइ फेन कोरोना जिटे नैसेकल जनैले बा । थप १६ जाने अस्पतालमे भर्ना हुइल बाटैं ।
अस्टेक, पाछेक २४ घण्टामे ६ जहनके उपचारके क्रममे मृत्यु हुइल अस्पताल जनैले बा । हाल अस्पतालके इमर्जेन्सी वार्डमे २१ पुरुष ओ ८ महिला करके २९ जाने उपचाररत बाटैं ।
