सामुदायिक वनमे बनाइल अवैध झोंप्री हटागैल

कञ्चनपुर, २ जेठ । कोरोनाके संक्रण उच्चरूपमे बह्रटी गैलबेला कञ्चनपुरमे निषेधाज्ञा जारी करल बा । अत्यावश्यक कार्यबाहेक बाह्य क्षेत्रमे नेंग्नाघुम्ना बन्द करल बा । निषेधाज्ञाके बेला कृष्णपुर नगरपालिका–२, वाणीस्थित वीरेन्द्र स्मृति सामुदायिक वनमे सुकुम्बासीके नाममे जग्गा अतिक्रमण करके टहरा निर्माण शुरु करल बा ।
सकुम्बासीके नाममे सामुदायिक वनमे बाँसके १२ से ढेर झोंप्री निर्माण करलपाछे सशस्त्र प्रहरी ओ सामुदायिक वनके पदाधिकारी भस्कैले बाटैं । टहरा निर्माण करुइयाहे उ क्षेत्रसे शनिच्चरके हटाइल सशस्त्र प्रहरी बल नेपाल नम्बर ३५ गण हेडक्र्वाटर शैलेश्वरीके सशस्त्र प्रहरी उपरीक्षक वीरेन्द्रबहादुर ऐर बटैलैं ।
“अवैधरूपमे सामुदायिक वनके जग्गा अतिक्रमण करके बनाइल टहरा भस्कैले बाटी”, उहाँ कलैं, “टहरा निर्माण करुइनहे सम्झाबुझाके उ क्षेत्रसे भगाइल बा ।” तीन दिनआघे किल कृष्णपुर–१ स्थित नवदुर्गा महिला सामुदायिक वनके जग्गा अतिक्रमण करके बैठल एक सयसे ढेर व्यक्तिहे सबडिभिजन वन कार्यालय वाणी, सशस्त्र प्रहरी, नेपाल प्रहरी ओ सामुदायिक वनके उपभोक्ताके सहयोगमे हटागिल रहे ।
