इजरायल ओ प्यालेस्टाइनबीच संघर्षविराम
काठमाडौं, ७ जेष्ठ । इजरायल ओ प्यालेस्टिनी विद्रोही हमास संर्घषविरामके लाग सहमत हुइल बा । ११ दिन लम्मा हिंसात्मक द्वन्द्वपाछे उहाँहुक्रे संघर्षविरामके लाग तयार हुइल हुइट ।
बीबीसीके अनुसार आज बिहानसे संघर्षविराम लागू हुइल बा । पाछेक द्वन्द्वमे १ सय जाने बालबालिका ओ महिलासहित कम्तीमे २ सय ३२ जाने प्यालेस्टिनी नागरिकके मृत्यु हुइल ।
अस्टेक इजरायलओर २ जाने बालबालिकासहित १२ जहनके मृत्यु हुइल बा । इजरायली सेनाके अनुसार हमास अभिनसम करिब ४ हजार रकेट प्रहार करले रहे । अस्टेक इजरायली सेना फेन सयौँ हवाई आक्रमण करटी गाजामे रहल महत्त्वपूर्ण भौतिक संरचना ध्वस्त बनैले रहे ।
बिफेक रात इजरायली मन्त्रिपरिषद्से ‘आपसी समझदारी ओ बिनासर्त’ संघर्षविराम करना अनुमति डेले रहे । अस्टेक हमासके अधिकारी फेन स्थानीय समयअनुसार आज बिहान २ बजेसे संघर्षविराम सुरु हुइल बटैले बाटैं । यीआघे बिफेक हमासके राजनीतिक अधिकारी मूसा अबु मार्जुक लेबनानी टेलिभिजन मायादीन टीभीसँगके बाटचितमे एक दुई दिनमे संघर्षविराम हुइना बटैले रहैं ।
