एमाले बलाइल स्थायी कमिटी बैठक
काठमाडौं, १० जेठ । नेकपा एमाले आज स्थायी कमिटीके बैठक बलैले बा । केन्द्रीय कार्यालय सचिव शेरबहादुर तामाङके अनुसार साँझ ४ बजे प्रधानमन्त्रीके सरकारी निवास बालुवाटारमे बैठक बैठे लागल हो ।
बैठकमे पाछेक राजनीतिक घटनाक्रम, पार्टीभित्तरके विवाद, स्पष्टीकरण पुछल नेताहुकनउप्पर कारबाहीके विषयमे छलफल हुइना हुइल बा ।
यीआघे शनिच्चर बैठल स्थायी कमिटी बैठकसे विपक्षी गठबन्धनके सरकार बनैना हस्ताक्षर करल २६ मध्ये ११ जानेहे स्पष्टीकरण पुछना निर्णय करल रहे । झलनाथ खनाल, माधवकुमार नेपाल, भीम रावल, मुकुन्द न्यौपाने, रामकुमारी झाँक्री, पुष्पाकुमारी कर्ण, सरला यादव, कलिला खातुन, नीरादेवी जैरू, लक्ष्मीकुमारी चौधरी ओ कल्याणी खड्काहे स्पष्टीकरण पुछल रहे ।
विपक्षी गठबन्धनके सरकार बनैना हस्ताक्षर करल मने स्पष्टीकरण नैपुछल बाँकी सांसदमध्ये कुछ अपने हस्ताक्षर नैकरल बटाइल कारण थप सोधपुछ ओ बाटचितपाछे किल आघे बह्रना निर्णय फेन बैठक करले रहे ।
प्रधानमन्त्री एवं अध्यक्ष केपी शर्मा ओली नेपाल समूहके नेताहुहनहे सेकटसम फुटाके छोट समूहहे किल पार्टीसे निष्कासन करना तयारी करले बाटैं ।
