सुदूरपश्चिम प्रदेशके पूर्व प्रदेश प्रमुख मल्लके निधन

धनगढी, १३ जेठ । सुदूरपश्चिम प्रदेशके पूर्व प्रदेश प्रमुख मोहनराज मल्लके निधन हुइल बा । पूर्व प्रदेश प्रमुख मल्लके कोरोना भाइरसके संक्रमणसे निधन हुइल उहाँक पूर्व स्वकीय सचिव धनसिँह क्षेत्री बटैलैं ।

कैलालीके भजनी स्थानीय मल्लके काठमाडौंमे उपचारके क्रममे निधन हुइल हो । उहाँक बुध रात ११ बजे निधन हुइल पूर्व स्वकीय सचिव क्षेत्री बटैलैं मल्ल निमोनिया ओ मुटुसम्बन्धी समस्यासे ग्रसित रहैं । उहाँक आज (बिफे) अन्त्येष्टि करजाइ ।

राष्ट्रिय प्रजातन्त्र पार्टीके नेता रहल उहाँ काँग्रेसमे प्रवेश करल रहैं । उहाँ पूर्व राष्ट्रिय पञ्चायतके सदस्य समेत रहल रहे । तत्कालीन प्रधानपञ्च समेत रहल मल्लहे २०७४ सालके माघमे नेपाली काँग्रेसके सभापति शेरबहादुर देउवाके सिफारिसमे राष्ट्रपतिसे सुदूरपश्चिम प्रदेश प्रमुखमे नियुक्त हुइल रहे । उहाँ २०७६ सालके असोज १८ गते पदमुक्त हुइल रहैं ।