परीक्षण ओ कन्ट्याक्ट ट्रेसिङमे बेवास्ता
अछाम, १४ जेठ । अछाममे वैशाख १९ गतेसे निषेधाज्ञा जारी करलेसे फेन कोरोना संक्रमित थपना क्रम घटल नैहो । दोसर लहरके संक्रमण गाउँगाउँसम पुगल बा । गाउँके चिया ओ किराना पसलमे भीडभाड हुइटीरना ओ निषेधज्ञा पालना नैकरके हुल बाँधके नेंगघुमके कारण संक्रमित बह्रल स्थानीय बटैठैं ।
‘स्वाब परीक्षणके लाग डेहलपाछे छुट्टे बैठेनाके साट्टा सबसँगे घुलमिल हुइठैं । निगरानी करना निकाय कोइ नैहो,’ मंगलसेन नगरपालिका–५ के राजेश भाट कलैं, ‘संक्रमित कत्रा हुइलैं, मृत्यु कत्रा हुइल कहिके सब निकाय संख्या गनके बैठल बाटैं । संक्रमण का कारणसे तीव्र गतिमे फैलल बा कनाबारे किहुहे मतलब नैहो ।’
संक्रमितके सम्पर्कमे आइलके अवस्था बुझेपरना ओ कन्ट्याट ट्रेसिङहे बह्राइपरना मंगलसेन–५ के स्वास्थ्य स्वयंसेविके मथुरा विष्ट बटैली । ‘लक्षण डेखाइल ढेर व्यक्ति कोरोना परीक्षण करले नैहुइट । और संक्रमित बह्रे सेक्ही,’ उहाँ कली, ‘गाउँमे कोरोना ढेर फैलसेकल बा । सरोकारवालाहे गाउँके अवस्था का बा कनाबारे हम्रे जानकारी डेना तयार बाटी ।’
अछामके कमलबजार प्रयोगशालामे पीसीआर परीक्षणके लाग संकलन करल सब स्वाब नयाँ संक्रमितके रहल सूचना अधिकारी टेकबहादुर विष्ट बटैलैं । ‘स्वाब लेहलपाछे लक्षण डेखापरलके आइल, कन्ट्याक्ट ट्रेसिङजैसिन अप्सन रहठ । पाछेक चरणमे कन्ट्याट ट्रेसिङके स्वाब आइल नैहो,’ उहाँ कलैं, ‘कन्ट्याक्ट ट्रेसिङ करलेसे संक्रमित ढेर बह्रही ।’
दोसर लहरमे अछाममे २ हजार ४७ जाने संक्रमित हुइल बाटैं । १५ जानेक मृत्यु हुइल स्वास्थ्य कार्यालय अछामके कोभिड फोकल पर्सन मीन कुँवर बटैलैं । मंगलसेन नगरपालिकामे ४ सय ५६, साँफेबगर नगपालिकामे २ सय ६२, बान्नीगढी जयगढ गाउँपालिकामे १ सय ७९, मेल्लेख गाउँपालिकामे १ सय ५७, रामारोशन गाउँपालिकामे १ सय ३० जाने संक्रमित बाटैं ।
अस्टेक, चौरपाटी गाउँपालिकामे ६४, कमलबजार नगरपालिकामे ३ सय ३०, तुर्माखाँद गाउँपालिकामे १ सय ३५, पञ्चदेवल विनायक नगरपालिकामे २ सय ७७ ओ ढकारी गाउँपालिकामे ४८ जाने संक्रमित हुइल बाटैं । बिफेसम १ हजार ४ सय जाने संक्रमित कोरोनामुक्त हुइल ओ ६ सय ३२ सक्रिय संक्रमित बाटैं । ‘संक्रमणके दर घटल नैहो बह्रल बा ।
संक्रमितमध्ये १५ प्रतिशत जोखिममे बाटैं,’ उहाँक कलैं, ‘परीक्षणके दर बह्रैलेसे धेर संक्रमित बह्रही ।’ उहाँक अनुसार हालसम मेल्लेखमे ४ जाने, मंगलेसनके ३ जाने, साँफेबगर ३ जाने, बान्नीगढी जयगढका २ जाने ओ चौरपाटीके २ जनाो कमलबजारके १ जाने करके जम्मा १५ जानेक मृत्यु हुइल हो ।
