मोटरसाइकल चोरीमे संलग्न २ जाने पक्राउ
धनगढी, १५ जेठ । कैलालीमे मोटरसाइकल चोरी करुइया २ जाने पक्राउ परल बाटैं । बिफेक रोज धनगढी उपमहानगरपालिका १७ के २१ वषिय सुरेश चौधरी ओ वडा नम्बर १५ के १८ वर्षिय राधाकृष्ण चौधरीहे जिल्ला प्रहरी कार्यालय कैलाली पक्राउ करले बा ।
प्रहरी ओइनहे चोरी करल मोटरसाइकल चलैटीरहल अवस्थामे पक्राउ करल जनैले बा । गैल अँट्वार जिल्लाके भजनी नगरपालिका ३ पडरियाके प्रेमराज जैसीके से ७ प ३२१६ नम्बरके पल्सर मोटरसाइकल चोरी हुइल रहे ।
उहाँक इलाका प्रहरी कार्यालयमे मोटरसाइकलके खोजतलासके लाग निवेदन पेश करले रहैं । खोजतलासके क्रममे धनगढी उपमहानगरपालिका ७ देवहरियामे उहाँहुकनहे मोटरसाइकलसहित पक्राउ करल प्रहरी जनैले बा ।
ओइनके विरुद्ध चोरी शीर्षकमे मुद्दा दर्ता करके जिल्ला अदालत कैलालीसे म्याद थप करना अनुमती मागके थप अनुसन्धान हुइटीरहल जिल्ला प्रहरी कार्यालय कैलालीके प्रहरी प्रवक्ता प्रहरी नायव उपरीक्षक प्रतिक विष्ट बटैलैं ।
