एमालेसे सुदूरपश्चिमके ६ मन्त्रीहे पुछल स्पष्टीकरण
धनगढी, १५ जेठ । नेकपा एमाले सुदूरपश्चिम प्रदेश कमिटीसे ६ जाने मन्त्रीहे स्पष्टीकरण पुछ्ले बा । शुकके नियुक्त हुइल ३ मन्त्री ओ ३ राज्यमन्त्रीहे स्पष्टीकरण पुछल हो ।
अध्यक्ष केपी शर्मा ओली पक्षसे बनाइल प्रदेश कमिटीके अध्यक्ष कर्णबहादुर थापा ओ सचिव राजेन्द्र सिंह रावलसे प्रदेश सरकारहे डेहल समर्थन फिर्ता लेना निर्णय विपरित मन्त्री बनल कटि स्पष्टीकरण पुछल हो । मन्त्री बन्ना ओ विपक्षीसँग साँठगाँठ करना जघन्य अपराध कहल कटि स्पष्टीकरणमे काहे कारबाही नैकरना २४ घण्टाभित्तर जवाफ डेना कहल रहे ।
ओली पक्षके नेताहुक्रे किल रहल स्थायी कमिटी बैठकसे सुदूरपश्चिम प्रदेश सरकारहे डेहल समर्थन फिर्ता लेना निर्णय करटी ३ मन्त्रीहे राजीनामा डेना निर्देशन डेले रहे । मने नेता माधवकुमार नेपाल समूहके बहुमत रहल प्रदेश संसदीय दलसे समर्थन फिर्ता नैलेना निर्णय करल ।
शुकेके ३ मन्त्रीसे राजीनामा डेले रहैं कलेसे चार मन्त्री ओ चार राज्यमन्त्री नियुक्त हुइल रहैं ।
एमाले संसदीय दलके नेता प्रकाशबहादुर शाह मन्त्रीमे दोहो¥याके दीर्घबहादुर सोडारी भौतिक पूर्वाधार, लालबहादुर खड्का सामाजिक विकास, पूर्णा जोशी आन्तरिक मामिलामन्त्री बनल रहैं कलेसे चुनकुमारी चौधरी, अर्चना गहतराज ओ मनाकुमारी साउँद राज्यमन्त्री नियुक्त हुइल रहैं ।
सुदूरपश्चिम कमिटीसे संसदीय दलके नेता शाहहे यीआघे स्पष्टीकरण पुछ्के कारबाही करना सिफारिस करल रहे । बाँकी ३ मन्त्री ओ ३ राज्यमन्त्रीहे स्पष्टीकरण पुछल एमाले जनैले बा ।
