गुम्बाके संरक्षकविरुद्ध बालयौन दुर्व्यवहारके मुद्दा दर्ता
धनगढी, १५ जेठ । कैलालीमे यौन हिंसा करल आरोपमे पक्राउ परल गुम्बाके सञ्चालकविरुद्ध मुद्दा दर्ता करल बा । जिल्लाके गोदावरी नगरपालिका–२, वनखेतस्थित अहिंसावादी विश्वशान्ति धर्म चक्र बौद्ध गुम्बाके संरक्षक गणेश मोक्तान लामाविरुद्ध मुद्दा दर्ता करल प्रहरी जनैले बा ।
गुम्बामे रहल बालिकाउप्पर यौन हिंसा करल आरोप लागलपाछे अनुसन्धानके लाग पक्राउ परल लामाविरुद्ध बाल यौन दुव्र्यवहारके मुद्दा शुकके दर्ता करल जिल्ला प्रहरी कार्यालयके प्रवक्ता प्रहरी नायब उपरीक्षक प्रतीक बिष्ट जानकारी डेलैं ।
गुम्बामे आश्रित २ जाने बालिकाके अभिभावक ओ १ जानेक ओरसे शान्ति पुनस्र्थापना केन्द्र धनगढीसे लामाविरुद्ध किटानी जाहेरी डेहल रहे । ओहे अनुसार मुद्दा दर्ता करके अदालतसे म्याद थप करटी उहाँउप्पर अनुन्धान सुरु करल प्रहरी नायब उपरीक्षक बिष्ट बटैलैं ।
गुम्बामे रहल कुछ बालिकासे संरक्षक लामा अपनउप्पर यौन हिंसा करल सार्वजनिक रुपमे बटाइलपाछे बिफे प्रहरी टोली गुम्बामे पुगल रहे । २०६५ सालमे स्थापित उ गुम्बामे लामा आश्रित बालबालिकाहे पह्रैटी आइल रहैं ।
गुम्बासे ९ बालबालिकाके उद्दार
उ गुम्बामे बैठ्टी आइल ६ बालिकासहित ९ बालबालिकाके उद्दार करल बा । जिल्ला प्रहरी कार्यालय कैलाली ओ बाल हेल्प लाइन धनगढीसे संयुक्त रुपमे उहाँहुकनके उद्दार करल हो ।
बाल हेल्प लाइन धनगढीके प्रमुख हरिलाल चौधरीसे ६ बालिका ओ ३ जाने उहाँहुकनके भैयनके उद्दार करल जानकारी डेलैं । उहाँहुकनहे अब्बे शान्ति पुनस्र्थापना केन्द्रमे ढरल बा ।
