टीकापुर अस्पतालमे अक्सिजन ओ एचडीयू व्यवस्थापन
टीकापुर, १६ जेन । अस्पतालसे मजा भूमिका निर्वाह करलपाछे टीकापुर अस्पतालमे कोरोना संक्रमित कम हुइ लागल मेडिकल सुपरिन्टेन्डेन्ट डा. रेमकुमार राई बटैले बाटैं । उहाँ स्थानीयस्तरसे फेन अक्सिजनके व्यवस्थापनमे सहयोग हुइलपाछे मृत्युदर कम हुइटी रहल बटैलैं ।
‘गम्भीर अवस्थामे बिरामीहे एचडीयूमे, सामान्यहे जनरल वार्डमे ओ कुछहे अब्जरभेसनमे ढरके उपचार सुरु करलीं,’ उहाँ कलैं, ‘सबके सहयोगसे संक्रमित बिरामी मर्न संख्यामे कमी आइल बा ।’
टीकापुरमे संक्रमितके संख्या भर कमी नैआइल डा. राई बटैलैं । उहाँ कलैं, ‘सामान्य अवस्थाके बिरामी अस्पताल आइल नैहुइट । घरमे सहे नैसेक्के अस्पताल आइटैं ।’ उहाँक अनुसार एक्के दिन धेर संख्यामे मृत्यु हुइटीरहे ।
वैशाख २६ गते ६ जाने ओ वैशाख २७ गते ८ जानेक मृत्यु हुइल रहे । ‘आंशिक रूपमे हुइलेसे फेन हम्रे भेन्टिलेटर सञ्चालनमे नन्ली । अब्बे मृत्युदर कम हुइल बा,’ डा. राई कलैं । अँट्वार ओ सोम्मार अस्पतालमे एक, एक जाने संक्रमितके मृत्यु हुइल बा ।
कुछ दिनआघे अस्पतालमे उपचारके लाग अइना बिरामीके संख्या ओ मृत्यु हुइना क्रम एकडम ढेर रहे । बिरामीहुकनके अस्पतालके बरन्डामे ढरकेसमेत उपचार हुइल रहे । ‘स्थिति नियन्त्रणसे करिब बाहेर गैल अवस्था रहे ।
सीमित स्वास्थ्यकर्मीसे धान्न मुस्किल हुइल रहे,’ डा. राई कलैं, ‘ओहेउप्पर अक्सिजनके चरम अभाव हुडेहल । मने स्थिति अब्बे नियन्त्रणओर आघे बह्रल बा । अस्पताल टिमके हिम्मतसे काम हुइटी बा ।’
टीकापुर अस्पतालमे सोम्मारके कोरोना संक्रमित तथ्यांकअनुसार एचडीयूमे १२ जाने, जनरल वार्डमे १६ जाने ओ अब्जरभेसनमे १३ जाने बिरामी उपचाररत रहल जनैले बा । पछिल्का २४ घण्टामे मृत्यु हुइनाके संख्या १ जाने बा ।
अस्पतालमे उपचाररत चोखाके डिस्चार्ज ६५ जाने हुइल बाटैं । पाछेक २४ घण्टामे कोरोनामुक्त हुके ६ जाने डिस्चार्ज हुइल अस्पताल जनैले बा । हालसम अस्पतालमे संक्रमित ३४ जहनके ज्यान गिल बा ।
