मृगौलापीडितके उपचारके लाग आर्थिक सहयोग जुटैटी
धनगढी, १८ जेठ । मृगौला रोगसे पीडित बाजुराके बुढीगंगा नगरपालिका–२, ब्रह्मतोलाके रामप्रसाद जैसीके उपचारके लाग आफन्त दाताहुकनसे आर्थिक सहयोग संकलन सुरु करटै । गरिबीके कारण उपचार कराइ नैसेकलपाछे परिवार आर्थिक सहयोगके लाग याचना करल हुइट ।
टमान व्यक्तिसे हालसम करिब एक लाख ४० हजार रुपैयाँ सहयोग प्राप्त हुइल रामप्रसादके भिनाजु पदमराज रेग्मी जानकारी डेलैं । विगत ८ वर्षसे मृगौला रोगसे पीडित जैसीके अब्बे दुनु मृगौला काम करे छोरल आफन्त बटैले बाटैं ।
हाल उहाँ मानव अंग प्रत्यारोपण केन्द्र भक्तपुरमे उपचार करैटी बाटैं । आर्थिक अभावसे उपचारमे समस्या हुइलपाछे आफन्तसे सहयोग करडेना आह्वान करले बाटैं । जैसीके बुवा नैहुइन । घरमे डाइ ओ बहिनिया किल बाटिन । दुई दिदीके विवाह हुसेकल बा ।
आम्दानीके स्रोत नहुके उहाँक डाइ उपचार करवाइ नैसेकठुइन । विगत आठ वर्षसे उहाँक भिनाजु पदम उपचार करैटी आइल बाटैं । मृगौला प्रत्यारोपण ओ उपचारमे धेर खर्च लग्ना हुइल ओरसे अप्ने फेन व्यहोरे नैसेक्ना अवस्था रहल पदम बटैलैं । ‘मै अपन क्षमतासे भ्याइटसम उपचार करैनु, मृगौला प्रत्यारोपणके लाग धेर खर्च लग्ना हुइल ओरसे ओत्रा ढेर रकम मै फेन जुटाइ नैसेक्ना रेग्मी कलैं, ‘टबेमारे जीवन रक्षाके लाग सहयोगके लाग याचना करनाके विकल्प नैहो ।’
परिवारके अनुसार उहाँक जीवन रक्षाके लाग मृगौला प्रत्यारोपण करेपरना सल्लाह चिकित्सक डेले बाटैं । स्वास्थ्यमे थप जटिलता आइ नैडेहेक लाग उहाँ कलि मृगौला प्रत्यारोपण करेपरना डाक्टर सल्लाह डेहल पीडितके आफन्त बटैले बाटैं । मृगौला प्रत्यारोपण ओ उपचारके लाग १३–१४ लाखसे ढेर रकम लग्ना बटागिल बा ।
मृगौलापीडित जैसीके आफन्त सहयोग करना इच्छुक व्यक्ति वा संघ संस्था उहाँक भिनाजु पदम रेग्मीके मोबाइल नम्बर ९८६९६१३७६५ मे सम्पर्क करना वा उहाँक दिदी कृष्नाकुमारी जैसीके नाममे सिद्धार्थ बैंक लिमिटेड ठीमी भक्तपुर शाखामे रहल खाता नम्बर ०१७१५४१४३५० मे रकम जम्मा करडेना आग्रह करले बाटैं ।
