करिया ढुसी संक्रमित एक जानेक मृत्यु

पहुरा समाचारदाता
धनगढी, २० जेठ । कैलालीमे एक जाने म्यूकरमाइकोसिस (करिया ढुसी) संक्रमितके मृत्यु हुइल बा ।
सेती प्रादेशिक अस्पतालमे उपचाररत कैलालीके बर्दगोरिया ६ के ६५ वर्षीय पुरुषके मृत्यु हुइल अस्पतालके सूचना अधिकारी दिलिपकुमार श्रेष्ठ जानकारी डेलै । सूचना अधिकारी श्रेष्ठके अनुसार जेठ १७ गतेसे अस्पतालमे उपचाररत उहाँक बिफे सकारे ७ बजे मृत्यु हुइल हो ।
श्रेष्ठ उ पुरुषसे पिसिआर परिक्षण करेबेर रिपोर्ट भर नेगेटिभ आइल बटैलै ।

‘सेती प्रादेशिक अस्पतालमे करिया ढुसीसे मृत्यु हुइना पहिल संक्रमित उहाँ हुइट’, सूचना अधिकारी श्रेष्ठ कहलै–‘यी आघे यैसिन लक्षणके कौनोफे संक्रमित अस्पतालमे फेला परल नइरहिट ओ उपचारमेफे नइहुइट ।’

मृतकके उपचारमे संलग्न डाक्टर शेरबहादुर कमर, डाक्टर निशान भट्टराई ओ डाक्टर अशोक श्रीपाईलीके टिम उहाँकमे करिया ढुसीके लक्षण डेखलपाछे बायोप्सी परीक्षण करेबेर पुष्टि हुइल रहे ।
मधुमेह, क्यान्सर लगायतके बिरामीमे यकर समस्या ढेर डेख्ना चिकित्सहुक्रे बटैले बटै ्। यी रोगसे बच्न अपन शरीरमे रोगप्रतिरोधी क्षमताहे घटे नइडेना बाटमे चनाख हुई पर्नामे सेती प्रादेशिक अस्पतालमे कार्यरत डाक्टर निशान भट्टराई बटैठै ।