गाउँभर कोभिड संक्रमण, संक्रमित स्वास्थ्यकर्मीसे उपचार
डोटी, २१, जेठ । डोटीके आदर्श गाउँपालिका–१, चाँसी गाउँ कोभिड–१९ से प्रभावित बा । गाउँपालिकाके स्वास्थ्य शाखासे डेहल जानकारी अनुसार गाउँके ८५ जहनके कोभिड परीक्षण करेबेर ५२ जानेमे संक्रमण पुष्टि हुइल बा ।
गाउँपालिकाके सिनियर अहेब बमबहादुर खड्का सिंगो गाउँ कोभिड संक्रमणसे प्रभावित हुइलपाछे उपचारमे फेन समस्या हुइल बटैलैं । ‘एक्के परिवारके ६ जानेसमहे संक्रमण पुष्टि हुइल बा,’ खड्का कलैं, ‘परीक्षण नैहुइल अन्य व्यक्तिमे फेन कोरोनासंग मिल्ना लक्षण डेखाइल बा । गाउँके अधिकाशंहे संक्रमण पुष्टि हुइलपाछे अन्य व्यक्ति परीक्षण करना अस्विकार करटैं ।’
उहाँक अनुसार ५२ जाने संक्रमितमध्ये दुई जाने स्वास्थ्यकर्मी फेन बाटैं । ‘प्रभावित गाउँमे अन्य स्वास्थ्यकर्मी जाइ सेक्ना अवस्था नैरहलपाछे संक्रमित स्वास्थ्यकर्मीसे अन्यके उपचार करटी बाटैं,’ उहाँ कलैं । ५२ जानेमध्ये अभिनसम कौनो संक्रमितहे फेन अस्पतालमे भर्ना करल नैहो ।
स्थानीय सक्कु गाउँ जोखिममे परल कटी उपचारके लाग स्थानीय ओ प्रदेश सरकारहे गुहारले बाटैं । स्थानीय दीपकबहादुर खड्का संक्रमितके उपचारसहित सुरक्षित स्थानमे बैठ्ना व्यवस्था करडेना सरकारसमक्ष माग करलैं ।
