दार्चुलाके तिंकरमे नेपाल प्रहरीके टोली खटल
धनगढी, २३ जेठ । नेपाल, भारत ओ चीनके त्रिदेशीय सीमा क्षेत्र दार्चुलाके तिंकरमे नेपाल प्रहरीके १३ जहनके टोली खटल बा ।
ब्याँस गाउँपालिका–१ मे पर्ना उ सीमा प्रहरी चौकीमे प्रहरी नायव निरीक्षक हर्कसिंह महताके नेतृत्वमे १३ जहनके प्रहरी टोली खटाइल जिल्ला प्रहरी कार्यालय जनैले बा ।
दार्चुलाके प्रहरी प्रमुख प्रहरी नायब उपरीक्षक मनोहरप्रसाद भट्ट स्थानीयबासी सदरमुकामसे तिंकर बसाइ सारे लागलओरसे उहाँहुकनके सुरक्षार्थ प्रहरी खटाइल बटैलैं । प्रहरी टोली शनिच्चर हेलिकप्टरमार्फत तिंकर पुगल बा ।
‘हेलिकप्टरमार्फत उहाँहुकनहे चाहना खाद्यान्न, हातहतियार एवम् दैनिक बन्दोबस्तीके सामान फेन शनिच्चर ढुवानी करली,’ डीएसपी भट्ट कलैं ।
प्रहरी टोली ६ महिनासम तिंकरमे बैठी । गर्मी मौसममे उहाँ बैठ्टी आइल स्थानीय वासिन्दा जार बह्रलओरसे सदरमुकाम खलंगामे अइठैं । अब्बे गर्मी मौसम हुइल ओरसे सदरमुकामसे ब्याँस गाउँपालिका–१ के छाङरु ओ तिंकरके वासिन्दा गाउँ लौटल बटैं ।
प्रहरीके कहाइ अन्सार शनिच्चरसम छाङरु ओ तिंकरके १ सय ५० परिवार सदरमुकामसे पशुचौपाया समेत लेके गाउँ आइल बटैं ।
स्थलगत निरीक्षण
प्रहरी प्रधान कार्यालयसे खटल प्रहरी नायब महानिरीक्षक (डीआईजी) प्रकाश अधिकारीके टोली सीमा क्षेत्रके स्थलगत निरीक्षण करके लौटल बा ।
शनिच्चर हेलिकप्टर मार्फत दार्चुला पुगल टोली छाङरु ओ तिंकर क्षेत्रके स्थलगत निरीक्षण करके आइल जिल्ला प्रहरी कार्यालयके प्रमुख डीएसपी भट्ट बटैलैं ।
उहाँ बैठेबेर प्रहरीहे भोगेपरना समस्याके बारेमे समेत डीआईजीके टोली चास ढरले रहे ।
