खाना पौष्टिक तत्वयूक्त ओ रोग प्रतिरोधात्मक क्षमता खैना आग्रह
पहुरा समाचारदाता
धनगढी, २४ जेठ । आजके स्वच्छ भोजन, काल्हके स्वस्थ जीवन कना नाराके साथ आज (सोम्मारके) रोज तेह्रौ राष्ट्रिय खाद्य स्वच्छता दिवस, २०७८ मनाजैटी रहल बा ।
खाद्य स्वच्छता तथा गुणस्तरबारे जनचेतना अभिबृद्धि कैना उद्देश्यके साथ विगत १३ बर्षसे हरेक वर्ष खाद्य स्वच्छता दिवस मनैटी आइल ओरसे आज तेह्रौ राष्ट्रिय खाद्य स्वच्छता दिवस, २०७८ मनाजैटी रहल खाद्य प्रविधि तथा गुण नियन्त्रण विभाग अन्र्तगत रहल खाद्य प्रविधि तथा गुण नियन्त्रण कार्यालय, धनगढीके प्रमुख बरिष्ठ खाद्य अनुसन्धान अधिकृत नवराज दाहाल जनैलै ।
‘मानव जीवनके लाग खाना ओ पानी आधारभूत एवम् अपरिहार्य आवश्यकता हो, शरीरहे स्वस्थ ओ तन्दुरुस्त रख्न खाना पर्याप्त हुके केल नइपुगठ,’ उहाँ कहलै, शरीरके लाग आवश्यक पर्ना टमान मेरिक पौष्टिक तत्व ओ रोग प्रतिरोधात्मक क्षमताफे हुई परठ ।’ खाना पर्याप्त ओ पौष्टिक हुइलेसेफे ओम्नने हानिकारक तत्वहुके झाडाबान्ता हुइना, अङभङ हुइना जैसिन समस्यासे क्यान्सरजैसिन प्राणघातक रोग लागके मृत्युफे हुई सेक्ना ओरसे खाद्य स्वच्छतामे विशेष ध्यान डेना उहाँ आग्रह करलै ।
खाद्य उद्यमी वर्गमे अपील
खाद्य ऐनमे रहल कानूनी व्यवस्था अनुसार खाद्य उद्योग स्थापना कैना पुर्व खाद्य प्रविधि तथा गुण नियन्त्रण विभाग अन्र्तगत रहल खाद्य प्रविधि तथा गुण नियन्त्रण कार्यालय, धनगढीसे सिफारीस लेना, उद्योगमे अपनाई पर्ना स्वच्छताके असल उत्पादन अभ्यास आचारसंहिता अवलम्बन करके खाद्य उद्योगके अनुज्ञापत्र लेके केल उत्पादन कैना कहल बा । खाद्य उद्योग दूषित, न्यूनगुणस्तरके वा हानीकारक खाद्य पदार्थ उत्पादन नइकैना, म्याद नाघल खाद्य पदार्थ विक्री वितरण नइकैना कहल बा ।
खाद्य व्यवसायी वर्गमे अपील
खाद्य वितरक, होलसेलर ओ रिटेलर वर्ग खाद्य प्रविधि तथा गुण नियन्त्रण विभाग अन्र्तगत रहल खाद्य प्रविधि तथा गुण नियन्त्रण कार्यालय, धनगढीसे जारी करल अन्सार खाद्य स्वच्छताके मापदण्ड पालन करे पर्ना, प्याक करल खाद्य पदार्थके लेवलमे उत्पादन मिति, उपभोग्य मिति, व्याच नं., तौल, उत्पादकके नाम ओ ठेगाना, समिश्रण आदी उल्लेख रहल खाद्य पदार्थ केल विक्री वितरणके लाग रख्ना कहल बा ।
खाद्य ऐन नियम अनुसार प्रतिकुल मन्ना दूषित, न्यूनगुणस्तर तथा हानीकारक खाद्य पदार्थ विक्रि वितरण नइकैना, उचित खाद्य भण्डारणके व्यवस्था कैना, खाद्य ओ अखाद्य पदार्थहे एक्के ठाउँमे नइरख्ना कहल बा ।
होटल, रेस्टुरेण्ट तथा घुमिफिरी बेच्ना खाद्य (स्ट्रीट फूड) बिक्रेता वर्गमे अपील
होटल रेस्टुरेन्ट तथा स्टीट फूड विक्रेता खाद्य प्रविधि तथा गुण नियन्त्रण विभाग अन्र्तगत रहल खाद्य प्रविधि तथा गुण नियन्त्रण कार्यालय, धनगढीसे जारी करल खाद्य स्वच्छताके मापदण्ड पालन करे पर्ना कहल बा ।
हाली सडगल जैना ढेर जोखिमयुक्त खाद्यवस्तु फेरसे तातुल करलेसे ७० डि.से. से ढेर तापक्रममे ततैना, तेलहे बारबार तताके प्रयोग नइकैना, सफा ओ पिना योग्य पानीके मात्र प्रयोग कैना जैसिन असल अभ्यास करे पर्ना कहल बा ।
उपभोक्ता वर्गमे अपील
कौनोफे सिलप्याक तथा डिब्बाबन्दी करल खाद्य पदार्थ खरीद करेबेर लेवलमे खाद्य पदार्थके नाम, उत्पादकके स्पस्ट ठेगाना, उत्पादन मिति, व्याच नम्वर, उपभोग करसेके पर्ना मिति, प्रयोग करल सामग्री ओ खुद तौल परिमाण रहल, नेपालमे उत्पादित हुइलेसे खाद्य अनुज्ञापत्र नम्वर उल्लेख करल ओ विदेशमे उत्पादित हुइलेसे उ देशके गुणस्तर निकायसे प्रदान करल लाइसेन्स नम्वर यकिन करके केल किन्ना कहल बा ।
लेवल अस्पस्ट रहल वा केरमेट करल तथा उपभोग्य मिति समाप्त हुसेकल खाद्य पदार्थ खरीद नइकैना कार्यालय जनैले बा । खुल्ला धारल खाद्य पदार्थ खरीद करेबेर ओसिलो हुके डल्ला परल, ढुसी लागल, किरासे क्षति पुगाइल, सरल गलल, अत्यधिक रंगके प्रयोग करल खाद्य पदार्थ खरीद नइकैना कहल बा ।
खाना तयार करेबेर भान्सा कोठा मजासे सरसफाई करके खाना पकैना, खैना आघे सावुन पानीसे मजासे हात धुइना, खाना पकाईबेर ७० डिग्री सेन्टिग्रेडसे उप्पर पकैना ओ भण्डारण करेबेर या जुर अवस्थामे फ्रिजमे ४ डिग्री सेन्टिग्रेडसे टरे टे तातुल अवस्थामे बाफ अइना करके ६० डिग्री सेन्टिग्रेडउप्पर रख्ना कहल बा ।
कोरोना महामारीके सम्वन्धमे सक्कु सरोकारवालामे अपील
कोभिड—१९ रोगके महामारीके सम्बन्धमे हालसम अन्तराष्ट्रिय स्तरमे हुइल करल अध्ययम अनुसन्धान अनुसार ओकर संक्रमण मनै–मनै बिचके सम्र्पकसे फल्ना करठ । खाद्य पदार्थसे मनैनमे उ रोगके संक्रमण हुइना हालसम कौनो तथ्य पुष्टि रहल नइहो ।
यी मेरिक भाइरस खाद्य पदार्थके सतह ओ प्याकेजिंग पदार्थ जस्टे प्लाष्टिक, स्टिल, कागज जैसिन वस्तुके सतहमे कुछ समयसम सक्रिय रहना बाट अनुसन्धानसे डेखल कहिके विश्व स्वास्थ्य संगठनके प्रतिवेदनमे उल्लेख हुइल बा । खाद्य पदार्थ उत्पादन तथा आपुर्ति व्यवस्थामे आवद्ध हुइना खाद्य उद्योगी, व्यवसायी एवं कामदार लगायत आम उपभोक्ता समेत नेपाल सरकार, स्वास्थ तथा जनसंख्या मन्त्रालयसे जारी करल आचार संहिता पालना करके कोरोना महामारीके संक्रमणसे जोगके स्वास्थ्य सुरक्षा कायम रख्ना अत्यन्त जरुरी कहल बा ।
खाद्य स्वच्छता ओ गुणस्तर सम्वन्धमे शंका लग्लेसे तत्काल सम्वन्धित आयात निर्यात गुणस्तर प्रमाणिकरण कार्यालय वा स्थानीय प्रशासन वा सुरक्षा निकायमे उजुरी करे सेक्ना जनाइल बा ।
