मन्त्रिपरिषद् विस्तारविरुद्ध सर्वोच्चमे रिट दर्ता
काठमाडौं, २४ जेष्ठ । कामचलाउ सरकारसे मन्त्रिपरिषद् विस्तार ओ पुनर्गठन करना असंवैधानिक हुइ कटि सर्वोच्चमे रिट दर्ता हुइल बा । दिनेश त्रिपाठी ओ कञ्चनकृष्ण न्यौपानेलगायतसे दायर करल रिट सर्वोच्चमे दर्ता हुइल हो । यी रिटमे मंगरके पेशी तोकजाइ ।
कामचलाउ सरकारसे मन्त्रिपरिषद् विस्तार करे नैमिल्ना कटि यी विस्तारमे मन्त्री हुइलहे काम करे नैडेना ओ आगामी दिनमे फेन मन्त्रिपरिषद् विस्तार नैकरना कहिके अन्तरिम आदेश माग करल रिट निवेदक अधिवक्ता न्यौपाने बटैलैं ।
चुनावी सरकार हुइलेसे फेन मन्त्रिपरिषद् विस्तार असंवैधानिक हुइल ओरसे रिट निवेदकके दाबी बा । राष्ट्रपतिसे वर्तमान सरकार काम चलाउ नैकलेसे फेन संविधानके धारा ७७ के उपधारा ३ अनुसार सरकार कामचलाउ रहल निवेदकहुक्रे दाबी करले बटैं । यी उपधारामे लिखल बा, ‘उपधारा १ बमोजिम प्रधानमन्त्रीके पद रिक्त हुइलमे औरे मन्त्रिपरिषद् गठन नैहुइटसम ओहे मन्त्रिपरिषद् कार्यसञ्चालन करी ।’
