मंगरके रोजसे ६० से ६४ वर्ष उमेर समूहहे खोप लगैना
काठमाडौं, २४ जेठ । सरकार मंगरसे देशभर कोरोनाविरुद्ध २ दिने खोप अभियान चलाइटा । चीनसे अनुदान प्राप्त भेरोसिल खोप उपत्यकाके काठमाडौं, भक्तपुर ओ ललितपुरमे ६० से ६४ ओ उपत्यकाबाहिरके हकमे ६२ से ६४ वर्ष उमेर समूहके मनैन्हे पहिल मात्रा लगाइ लागल हो ।
सुरुमे ६० से ६५ वर्ष उमेरके सबहे खोप लगैना कहलमे संख्या बह्रे सेक्ना हुइल ओरसे उपत्यकामे ६० से ६४ ओ बाहेर ६२ से ६४ वर्ष उमेर छनोट करल स्वास्थ्य मन्त्रालयके एक अधिकारी बटैलैं ।
काठमाडौंके प्रमुख जिल्ला अधिकारी कालीप्रसाद पराजुली काठमाडौं महानगरपालिकाके सब वडामे खोप व्यवस्था करल बटैलैं । औरे पालिका तोकल स्थानमे खोप व्यवस्थापन करही ।
अस्टेक भक्तपुरके प्रजिअ प्रेमप्रसाद भट्टराईके अनुसार जिल्लाभर सब स्वास्थ्य चौकीमे खोप लगैना व्यवस्था करल बटैलैं । ललितपुरके सहायक प्रजिअ ललितकुमार बस्नेतके अनुसार महानगर ओ महालक्ष्मी नगरपालिकामे २ दिन ओ बाँकी पालिका एक्के दिनमे खोप लगासेक्ना अपेक्षा लेले बा ।
