कञ्चपुरमे १९ वर्षिया युवतीउप्पर सामूहिक बलात्कार

कञ्चनपुर, २८ जेठ । कञ्चनपुरके बेदकोट नगरपालिका–५ के १९ वर्षिया १ युवतीउप्पर सामूहिक बलात्कार हुइल बा । धरमपुरस्थित मुक्तकमैया शिविरके उ किशोरीउप्पर बिफेक रोज बलात्कार हुइल हो ।

नसालु पदार्थ खुवाके स्थानीय २ युवा उहिनहे सामूहिक बलात्कार करल प्रारम्भिक अनुसन्धानसे खुलल जिल्ला प्रहरी कार्यालय कञ्चनपुरके डिएसपी अमर थापा जानकारी डेलैं ।

बलात्कारमे संलग्न रहल आरोपमे ओहे ठाउँके २२ वर्षिय धनबहादुर बिकहे प्रहरी पक्राउ करले बा । औरे युवा फरार रहल थापा बटैलैं । ‘घटनामे २ जाने संलग्नता रहल खुलल बा । १ जहनहे नियन्त्रणमे लेले बटि,’ डिएसपी थापा कलैं, ‘औरे आरोपीके खोजी हुइटा ।’ बलात्कार आरोपीके खोजीके लाग प्रहरी परिचालन करल उहाँ बटैलैं ।

‘नसालु पदार्थ खुवाके बलात्कार करल खुलल बा । घटनाके थप अनुसन्धान हुइटी बा,’ डिएसपी थापा कलैं । बलात्कारमे परल युवती शारीरिक रुपमे अशक्त बटि ।