१० जानेमे सीमित नेपाल ३–० गोलसे पराजित

काठमाडौं, २९ जेठ । विश्वकप तथा एसियन कपके छनोटके अन्तिम खेलमे नेपाल हेभिवेट अस्ट्रेलियाविरुद्ध ३–० के हार बेहोरले बा । कोरोना भाइरसके कारण सेन्ट्रल भेन्यू कुवेतमे हुइल खेलके दोसर हाफमे नेपाल १० जहनमे सीमित हुके खेलले रहे ।

कुवेतके जाबेर अल–अहमद रंगशालामे छैठौं मिनेटमे नेपाल पहिल गोल खैले रहे । अस्ट्रेलियाके म्याथ्यु लेकी गोल करके नेपालविरुद्ध अग्रता डिलैले रहैं ।

पहिल हाफके खेल ओरैना ७ मिनेट बाँकी रहलमे फ्रान काराचिच पुनः गोल करके अस्ट्रेलियाके अग्रता दोब्बर परलैं । विपक्षी खेलाडीहे गोल करना स्पष्ट मौकामे फाउल करलसँगे अनुभवी डिफेन्डर रोहित चन्द पहिल हाफके इन्जुरी समयमे लाल कार्डके सामना करटि मैदानसे बाहेर हुइँलैं ।

अपनसे १३० स्थान उप्पर रहल टोली अस्ट्रेलियाविरुद्ध नेपाल १० जहनमे सीमित रलेसे फेन पाछेक ४५ मिनेट मजा डिफेन्सिभ खेल प्रस्तुत करल ।

अस्ट्रेलियासे करल लगातार प्रहारमे नेपालके कप्तान तथा गोलकिपर किरण चेम्जोङ टमान गोल बचैले रहैं । नेपालके लाग पहिलचो टोलीमे समावेश हुइल आयुष घलान, सुरज जेउ ठकुरी ओ कमल थापा डेब्यु करलैं ।