सेती अस्पतालसे ‘टेलिमेडिसिन’ सेवा सुरु, फोनसे सल्लाह लेहे सेक्ना
धनगढी, ३० जेठ । कोरोना भाइरसके दोसर लहरपाछे ओपीडी सेवा बन्द करल सेती प्रादेशिक अस्पताल ‘टेलिमेडिसिन’ सेवा सुरु करले बा । जोनअनुसार प्रदेशभर रहल स्वास्थ्यकर्मी तथा बिरामीहुक्रे फोनसे सम्पर्क करके आपतकालिन सल्लाह लेहे सेक्ही ।
अँट्वारके अस्पताल एक सूचना जारी करके कोरोना तथा वर्षातके मौसममे देखापर्ना सर्पदंश, मलेरिया, कालाजार, डेंगु, मेनिन्जाइटिस तथा नैसर्ना रोग (डाइबेटिज, उच्च रक्तचाप ओ मुटुरोग) सम्बन्धी परामर्श लेना विशेषज्ञ चिकित्सकहे सम्पर्क करना अनुरोध करले बा ।
अस्पतालमे कार्यरत विशेषज्ञ चिकित्सक डा.शेरबहादुर कमर, डा.निराजनदत्त शर्मा, डा.सन्तोष पाण्डे ओ डा.निशान भट्टराईहे बिहान १० बजेसे दिनके ३ बजेसम सम्पर्क करे सेकजाइ ।
का हो टेलिमेडिसिन सेवा ?
टेलिमेडिसिन अर्थात् दूर–चिकित्सा, चिकित्सा क्षेत्रमे हुइल नविनतम विकासमध्ये परठ । सामान्य हिसाबमे बुझ्ना हो कलेसे टमान प्रविधिके प्रयोग करके एक ठाँउके बिरामीहे औरे ठाँउक चिकित्सक वा स्वास्थ्यकर्मीसंग परामर्श लेके उपचार करनाहे टेलिमेडिसिन कहिके बुझे परठ । यकर दायरा एक सामान्य मोबाइलमे करना परामर्शसे लेके, भिडिओ कन्फ्रेन्स, वेबिनार आदिसम हुइ सेकठ ।
यदि हम्रे टेलिमेडिसिनहे दुर्गम क्षेत्रके लाग किल हो कहिके बुझब कलेसे हम्रे गलत हुब, किहेकि विकसित देशमे फेन एक ठाँउके विज्ञता तथा प्रविधिहे औरे ठाँउमे प्रयोग करेक लाग टेलिमेडिसिनके प्रयोग करजाइठ । टेलिमेडिसिनके माध्यमसे बिरामीके उपचारके लाग परामर्श किल नैहोके आजकल यकर प्रयोग करके एक ठाँउके चिकित्सकसे औरे ठाँउके बिरामीके शल्यकृया समेत करल उदाहरण पाजाइठ ।
टेलिमेडिसिन स्वास्थ्यकर्मीहुकनबीच चिकित्सा क्षेत्रमे हुइल नविनतम खोज ओ अनुसन्धानके बारेमे अनुभब साटासाट करना माध्यम फेन हो । एक ठाँउमे सफल हुइल उपचार पद्धति औरे ठाउँमे प्रयोग करे सेक्ना अवसर फेन टेलिमेडिसिनके माध्यमसे सम्भव रहठ । स्वास्थ्यकर्मीहुक्रे अपन ज्ञान, सीप, क्षमता बह्रैना सहजिल माध्यम फेन यी हुइ सेकठ ।
