नेपाल–भारत सीमामे तारबार लगैना सांसद तामाङके माग
धनगढी, ३० जेठ । सुदूरपश्चिम प्रदेशसभा सदस्य तारा लामा तामाङ प्रदेश सरकारहे नेपाल–भारत सीमा क्षेत्रमे तारबार लगैना माग करले बटैं ।
नीति तथा कार्यक्रमउप्परके छलफलके क्रममे उहाँ भारतीय पक्ष बेरबेर सीमा क्षेत्रमे अवरोध करल कटि तारबार लगाइपरना बटाइल हुइँट् ।
‘नेपाली भूमि भारत अतिक्रमण करे खोजल बा । विकासके आयोजना रोक्ना काम करठ’ उहाँ कलैं, ‘सब ठाउँमे भारी संरचना निर्माण करे नैसेक्लेसे फेन तारबार करेपरठ ।’
भारतीय सीमा सुरक्षा बल (एसएसबी) से कञ्चनपुरमे निर्माण हुइटीरहल हुलाकी सडकमे फेन कैचो अवरोध करटिरहल ओर अंंग्रैटि उहाँ कञ्चनपुरसे दार्चुलासमके सीमा व्यवस्थित करना माग करले बटैं ।
‘केन्द्रसँग समन्वय करके तारबार करेपरल । यी राष्ट्रियताके सवालसँग जोरल विषय हो’, उहाँ कलैं, ‘भारत अइना ओ जैना कामदारहुक्रे फेन व्यवस्थापन मजासे करेपरल नैटे भविष्यमे संकट आइ सेकि ।’
तामाङ भारतीय पक्षसे हत्या करल गोविन्द गौतमके क्षेत्रसे प्रदेशसभामे निर्वाचित सांसद हुइँट् । २०७३ फागुन २६ मे नेपाली भूमि अतिक्रमणके विषयमे विवाद हुके भारतीय पक्षके गोली लागके गौतमके मृत्यु हुइल रहे । अभिन फेन यहाँ सीमा विवाद कायमे बा ।
सरकार नीति तथा कार्यक्रमे यी विषय नानेपरना सांसद तामाङ माग करलैं । बिफेक रोज प्रस्तुत नीति तथा कार्यक्रमउप्पर सोम्मार छलफल ओराइटा ।
