सुदूरपश्चिम सरकारके नीति तथा कार्यक्रम बहुमतसे पारित
ध्नगढी, ३० जेठ । सुदूरपश्चिम प्रदेश सरकारके आगामी आर्थिक वर्षके नीति तथा कार्यक्रम प्रदेशसभामा बहुमतसे पारित हुइल बा । अँट्वार बैठल प्रदेशसभा बैठकमे मुख्यमन्त्री त्रिलोचन भट्ट नीति तथा कार्यक्रमउप्पर उठल प्रश्नके जवाफ डेहलबाद बहुमतसे पारित हुइल हो ।
नेकपा माओवादी केन्द्र ओ नेकपा एमालेके माधव पक्षके बहुमत प्रदेशसभा सदस्यहुक्रे नीति तथा कार्यक्रमके समर्थन करलपाछे सभामुख अर्जुनबहादुर थापा प्रदेशसभासे पारित हुइल घोषणा करलैं ।
‘सभामे प्रस्तावके पक्षमे रहल माननीय सदस्यहुकनके संख्या ढेर डेखाइल ओरसे आगामी आर्थिक वर्षके नीति तथा कार्यक्रम सभा बहुमतसे पारित हुइल घोषणा करटुँ,’ सभामुख थापा बलैं । बैठकमे मत विभाजन नैकरके सभामुख प्रस्तावके पक्षमे हुइनाहे हुइठ ओ विपक्षमे हुइनाहे नै कना आग्रह करले रहैं । उ क्रममे नेकपा एमाले ओली समूहके ७ जाने प्रदेशसभा सदस्य नै कले रहैं ।
प्रदेश संसदीय दलसे ह्वीप जारी करल अवस्थामे फेन एमाले ओली पक्षके सांसदसे विपक्षमे मत व्यक्त करल हुइँट् । पार्टी सरकारसे डेहल समर्थन फिर्ता लेसेकल नीति तथा कार्यक्रमके विपक्षमे मत व्यक्त करल प्रदेशसभा सदस्य लिलाधर भट्ट बटैलैं ।
प्रमुख प्रतिपक्षी दल नेपाली काँग्रेस ओ जनता समाजवादी पार्टीके प्रदेशसभा सदस्य मौन बैठल बटैं । गिल बिफेक रोज प्रदेश प्रमुख गंगाप्रसाद यादव प्रदेशसभामे नीति तथा कार्यक्रम पेश करले रहैं । प्रदेश सरकार असार १ गते दिनके ४ बजे बैठ्ना प्रदेशसभा बैठकमे आगामी आर्थिक वर्षके बजेट नन्ना हुइल बा ।
