सुरक्षित मातृत्व संजाल महासंघ नेपालसे रक्तदान कार्यक्रम

पहुरा समाचारदाता
धनगढी, ३० जेठ । सुरक्षित मातृत्व संजाल महासंघ नेपालसे आयोजना करल एक महिने रक्तदान कार्यक्रम आज सम्पन हुइल बा ।

कोरोना महामारीके दुसर चरण सुरु हुइलपाछे रगतके अभाव नहोए कहटी जेठ १ गतेसे रक्तदान कार्यक्रमके आयोजना करल संजालके सुदूरपश्चिम प्रदेश अध्यक्ष विनय लामा बटैलै । यी अवधिमे करिब साढे तीन जाने रक्तदान करल उहाँ जनैलै । ओस्टेक संजाल धनगढी उपमहानगरपालिका ओ साविक गदरिया गाविसके दुई वडाके ६ सय ५० जाने गर्भवती ओ विपन्न वर्गके महिलाहुकनके प्रतिव्यक्ति ४ हजार बराबरके पोषणयूक्त खादयन्न वितरण करे लागल बटैलै ।

एक महिने रक्तदान कार्यक्रमके समापन धनगढी उपमहानगरपालिकाके नगर प्रमुख नृप बहादुर वड करले रहिट । कार्यक्रममे नेपाली काँग्रेसके नेता नारायण भट्ट, नेपाल रेडक्रस सोसाइटीके सभापति उत्तम जोशी, नेपाल पत्रकार महासंघ कैलालीके अध्यक्ष हिमालय जोशी, नेपाल पत्रकार महासंघके सदस्य दिपक उपाध्याय लगायत मन्तव्य व्यक्त करले रहिट ।

सुरक्षित मातृत्व संजाल महासंघ नेपालके सुदूरपश्चिम प्रदेश अध्यक्ष विनय लामाके अध्यक्षतामे हुइल समापन कार्यक्रमके संचालन संजालके जिल्ला अध्यक्ष तपेन्द्र भुषाल करले रहिट ।