चौधरी ग्रुपके प्रादेशिक कार्यालय उदघाटन
अक्सिजन कन्सन्ट्रेटर वितरण
पहुरा समाचारदाता
धनगढी,३१ जेठ । चौधरी ग्रुपके प्रादेशिक कार्यालय धनगढी उपमहानगरपालिका वडा ५ के उदघाटन हुइल बा ।
सुदूरपश्चिम ओ कर्णाली प्रदेश हेरना कैके प्रादेशिक कार्यालयके उदघाटन हुइल सीजी ग्रुपके प्रदेश प्रसाशक प्रोभिन्स एडमिसट्रेटर स्माइल चौधरी जनैलै । प्रादेशिक कार्यालयके उदघाटन तथा चौधरी फाउण्डेशनसे कोभिड १९ महामारीके विमारी उपचारीके लाग अक्सिजन कन्सन्ट्रेटर वितरण धनगढी उपमहानगरपालिकाके नगर प्रमुख नृप बहादुर वड करल रहिट ।
दुई प्रदेशमे सीजी ग्रुपसे हुइना सक्कु गतिविधि सुदूरपश्चिम प्रादेशिक कार्यालयसे हेर्ना जनागिल बा । चौधरी ग्रुपसे सुदूरपश्चिम प्रदेशके धनगढी ओ कर्णाली प्रदेशमे अक्सिजन प्लान्ट स्थापना करेक लाग सहयोग करटी रहल बा । अक्सिजन प्लान्ट निर्माण प्रक्रिया आघे बह्रल ओरसे यिहे असार महिनासे अक्सिजन ग्याँस उत्पादन हुइना प्रोभिन्स एडमिसट्रेटर स्माइल चौधरी जनैलै ।
ओस्टेक आज सुदूरपश्चिम प्रदेशके ६ ठो स्वास्थ्य संस्थाहे वितरण करल अक्सिजन कन्सन्ट्रेटरके एक ठो मोल २ लाख परठ । उ अक्सिजन कन्सन्ट्रेटर गोदावरी नगरपालिकाके मालाखेती अस्पतालमे २ ठो, बेलौरी नगरपालिकाके बेलौरी अस्पतालमे २ ठो ओ बैतडीके श्रीकोट स्वास्थ्य चौकीमे दुई ठो हस्तान्तरण करल बा ।
