बैतडीके दोगडकेदारमे रोकल सब सेवा सुरु
बैतडी, ३ असार । दोगडाकेदार गाउँपालिकाके सब सेवा बिफेसे सुरु हुइल बा । जिल्लामे कोरोना संक्रमण फैलटि रहलबाद गैल वैशाख २० गतेसे जारी निषेधाज्ञामे बन्द रहल सेवा बिफेक रोजसे नियमित रुपमे प्रवाह हुइल हो ।
गैल वैशाख २० गतेसे गाउँपालिका तथा वडा कार्यालय अत्यावश्यक सेवा किल डेटि आइलमे आजसे सब कार्यालय नियमित सेवा सुरु हुइल गाउँपालिकाके निमित्त प्रमुख प्रशासकीय अधिकृत रवीन्द्रबहादुर धामी जानकारी डेलैं । उहाँ कलैं, ‘आर्थिक वर्ष ओरैना १ महिना किल बाँकी रहल चालु आर्थिक वर्षके कुछ योजना कार्यान्वयन तथा आगामी आर्थिक वर्षके नीति कार्यक्रम तथा बजेट तयार करेपरना बाध्यता रहल कार्यालय सञ्चालनमे नानल हो ।’
कार्यालय सञ्चालनके समयमे अनिवार्य रुपमे स्वास्थ्य सुरक्षाके आवश्यक मापदण्ड पालना करके सब सेवा प्रवाह करना हुइल हो ।
कोरोना संक्रमण कुछ कम हुइल ओरसे असार १५ गतेसमके लाग जिल्लामे चौथा चरणके निषेधाज्ञा जारी रहल बा ।
गाउँपालिका यीआघे अपनसंग रहल सब सवारी साधन कोरोना नियन्त्रणमे प्रयोग करना घोषणा करसेकले बा ।
