सयसे ढेर निजी नर्सिङ कलेज बन्द हुइना

काठमाडौं, ४ असार । राष्ट्रिय चिकित्सा शिक्षा आयोगके बाध्यकारी नियमअनुसार अपन भवन नैरहल नर्सिङ कलेजसे नयाँ शैक्षिक सत्रसे विद्यार्थी भर्ना करे नैपैना हुइल बा । टबमारे सयसे ढेर निजी नर्सिङ कलेज बन्द हुइना अवस्थामे बा ।

हाल देशभर कोरोना महामारीके उच्च जोखिम रहल ओ नर्सहुकनके थप चाह रहल अवस्थामे चिकित्सा शिक्षा आयोग व्यवस्था करल नर्सिङ कलेजके सय बेडके अपन भवन हुइपरना बाध्यकारी ऐनके कारण कलेज बन्द हुइना ओ तीन हजार ६ सय विद्यार्थी नर्सिङ पह्रनासे वञ्चित बन्ही । आयोगके चिकित्सा शिक्षा ऐन २०७५ अनुसार नर्सिङ विषय सञ्चालन करना शिक्षालयके अपन सय बेडके अनिवार्य अस्पताल हुइपरना व्यवस्था करल बा ।

आयोगसे अस्पताल बनैना कलेजहे दुई वर्षके अवधि फेन डेहल । यी अवधि गैल वर्ष ओराइल बा । दुई वर्ष बितसेकल समेत स्वास्थ्य विषय पठनपाठन करैना प्राविधिक शिक्षा तथा व्यावसायिक तालिम परिषद् (सिटिइभिटी) अन्तर्गतके शिक्षालयसे अपन अस्पताल बनाइ सेकल नैहो । विश्वविद्यालयअन्तर्गत सञ्चालित नर्सिङ कलेजके समेत अपन अस्पताल नैहो ।

अत्रा किल नैहो, सिटिइभिटीके नर्सिङ पह्राइ हसइना पाँच आंगिक कलेजमे समेत अपन अस्पताल नैरहल सिटिइभिटीके प्रवक्ता विनोद बडाल बटैलैं । उहाँक अनुसार सिटिइभिटीके आंगिक ओ सम्बन्धन प्राप्त करके ९० शिक्षालयसँग अपन अस्पताल नैहो । अन्य विश्वविद्यालयके २० नर्सिङ कलेजके फेन अपन अस्पताल नैरहल उहाँ बटैलैं ।