निसर्गमे निकारगिल पेटसे ७ किलोके ट्युमर

पहुरा समाचारदाता
धनगढी, ४ असार । धनगढीके निसर्ग हस्पिटल एण्ड रिसर्च सेन्टर प्रालिमे महिलाके पेटसे ७ किलोके ट्युमर (मासुके डल्ला) निकारल बा ।

बिगत १२ वर्षसे पेटके समस्या झेल्टी आइल गोदावरी नगरपालिका–११, के ६० वर्षिया नरपता कामीके पेटसे शल्यक्रिया करके उ ट्युमर निकारल अस्पताल जनैले बा ।

नरपताके पेटमे ह्युज ओभरिन ट्युमर रहल ओरसे उपचारमे संलग्न स्त्रीरोग विशेषज्ञ डाक्टर नजमुस्सबा अन्सारी बटैलैं ।

नरपताके पेटसे निसर्ग अस्पतालके स्त्रीरोग विशेषज्ञ डाक्टर नजमुस्सबा अन्सारी, एनेस्थेसियोलोजिस्ट डा हेमन्त ओझा, वरिस्ठ जनरल तथा ल्याप्रोस्कोपिक सर्जन डा मिराज आलम अन्सारीलगायतके टिम सल्यक्रिया सफल करल हो ।

नरपताके डम्डा रामबहादुर कामीके अनुसार १२ वर्ष आघे भारतमे चेकजाँच करलमे सासु नरपताके पेटभित्तर छोट मासुके डल्ला रहे ओ अप्रेशन करेपरना सुझाब डाक्टर डेले रहे ।

कुछ समय औषधि किल खाके बैठल ओरसे नरपताके पेटके अकार १ वर्ष आघेसे भर अस्वाभाविक रुपमे भारी हुइटि जाइटेहे । अप्रेशन नैकरल ओरसे नरपताके पेटमे मासके डल्ला आकार लेहल परिवारके सदस्य बटैलैं । ‘पहिले सामान्य मानके ओत्रा चास नैकरलि, अब्बे अइसिन समस्या आइल,’ रामबहादुर कलैं ।

एकाएक पेट फुलके भारी ओ गह्रुक हुइलपाछे डम्डा रामबहादुर सासुके धनगढीमे सिटी स्क्यान करैले रहैं । हेरलमे मासके डल्ला डेखाइल ओ क्यान्सके सम्भावना रहल अनुमान करलेसे फेन सिटी रिपोर्टमे क्यान्सर नैरहल पुष्टि हुइल बाद अप्रेशन करल अस्पताल जनैले बा ।

समयमे उपचार हुइ नैसेक्के ट्युमर बह्रके भारी हुइल चिकित्सकके कहाइ बा । सल्यक्रियापाछे नरपताके स्वास्थ्य अवस्था सामान्य रहल उपचारमे संलग्न चिकित्सकहुक्रे बटैले बटैं ।