कैलालीमे निषेधाज्ञ असार १५ गतेसम ठपल

निजि सवारी जोर विजोर प्रणालीमे चल्ना, पसल खोल्ना समय साँझ ३ बजेसम बह्रल
पहुरा समाचारदाता
धनगढी,७ असार । जिल्ला प्रशासन कार्यालय कैलाली निषेधाज्ञहे असार १५ गतेसम निरन्तरता डेले बा । सोम्मारके बैठल बैठकसे निषेधाज्ञके तालिका परिमार्जन करटी असार ८ गतेसे लागु हुइना करके असार १५ गते निरन्तरता डेहल प्रमुख जिल्ला अधिकारी खगेन्द्र प्रसाद रिजाल बटैलै ।

परिमार्जित तालिका अनुसार मनैनके भिडभाड हुइना मेरिक कार्यक्रम सभा सम्मेलन, गोष्ठी, तालिम, सेमिनर, सिनेमा हल, पार्टी प्यालेस, डान्सबार, दोहोरी, नाँच घर, क्लव, स्वीमिङ पुल, पार्क, मनोरन्जनस्थल, सैलुन, व्यूटीपार्लर, हेल्थ क्लव, फुटसल, जिमखाना, पुस्ताकालय, संग्राहलय, सामुहिक खेल्ना दर्शक सहित खेलकुद बन्द रहना कहल बा । मने खाद्य सामग्रीके पसल, निर्माण सामग्री, हार्डवेयर, इलेक्ट्रोनिक्स ओ भाडा वर्तनके पसल, पुस्तक तथा स्टेशनरी पसल, कपडा तथा फेन्सी पसल ओ टेलरिङ सेन्टर सकारे ६ बजेसे साँझ ३ बजेसम खोले सेक्ना कहल बा ।

शिक्षण संस्था बाहेक अतिआवश्यक सेवा प्रदान कैना सरकारी कार्यालय, पालिक पाला करके स्वास्थ्य सुरक्षाके मापदण्ड पालना कराके कार्य प्रकृति अनुसार न्यूनतम संख्यामे केल कर्मचारी उपस्थित हुइना मेरिक सेवा प्रवाह कैना व्यवस्था मिलैना कहल बा ।

बीमा बैक तथा वित्तीय सेवाके हकमे सकारे ८ बजेसे दुपहर १२ बजेसम केल संचालन कैना, और विषयके हकमे नेपाल राष्ट्र बैकसे जारी करल निर्देशन बमोजिम रहना कहल बा ।
वर्कसप ढेरमे तीन जाने केल कामदार धारके सकारे ७ बजेसे साँझ ७ बजेसम खोल्न, होटल, रेष्टुरेन्ट खाजा तथा चिया पसल पूर्ण रुपमे बन्द रहना मने स्वास्थ्य सुरक्षाके मापदण्ड पालना करटी सकारे ८ बजेसे साँझ ८ बजेसम होम डेलिभरी तथा टेक अवे सेवा केल डेहे सेक्ना कहल बा ।

जोर विजोर प्रणालीके आधारमे संचालन कैना करके निजि सवारी साधान ( कार, जीप, भ्यान) मे चालक सहित ढेरमे ४ जाने, टयाक्सीमे चालक सहित ३ जाने, अटोमे चालक सहिट ३ जाने चढे मिल्ना कहल बा । अटो, मोटरसाइकल ओ स्कुटीमेफे जोर विजोर प्रणाली लागु हुइना करके संचालन करे सेक्ना कहल बा । यी व्यवस्था जिल्ला भिटर केल लागु हुइल ओ बाहेर गैलेसे पास लेहे पर्ना कहल बा ।