धनगढी उपमहानगरके बजेट १ अर्व ८१ करोड २८ लाख
पहुरा समाचारदाता
धनगढी ९ असार । धनगढी उप–महानगरपालिका आर्थिक बर्ष २०७८÷०७९ के वार्षिक नीति, कार्यक्रम तथा बजेट मंगर सातौं नगरसभामे पेश करले बा ।
धनगढी उप–महानगरपालिकाके उप–प्रमुख सुशिला मिश्र भट्ट नगरसभामे पेश करल बजेट १ अर्व ८१ करोड २८ लाख २२ हजार १ सय रहल बा । जौन मन्से चालु ओर १ अर्व २ करोड ८० लाख ७० हजार ओ पुँजीगतओर ७८ करोड, ४७ लाख ५१ हजार रहल बा ।
बजेट तथा कार्यक्रमसे कोभिड १९ से सृजित समस्या व्यवस्थापन, स्वास्थ्य, सरसफाई ओ विपद व्यवस्थापन, स्वास्थ्य तथा मानव सामथ्र्य विकास, कृषि उत्पादन ओ उत्पादकत्व अभिवृद्धि, शिक्षा तथा रोजगारी, पूर्वाधार निर्माण तथा दिगो विकास, सूचना प्रविधि तथा सञ्चारमे विकास, उद्यम, स्वरोजगारी ओ सहकारीताके विकास, मानव संसाधन तथा संस्थागत सुशासन, सामाजिक विकास तथा गरिवी निवारण लगायतके क्षेत्रहे प्राथमिकतामे रख्ले बा ।
कृषिओर किसानहे प्रोत्साहन कैना किसान क्रेडिट कार्यके व्यवस्था कैना, सामुदायिक वनमे जडिबुटी खेती, कृषक पहिचान तथा परिचयपत्र, कृषि बजार मुल्य सूचना प्रणालीके व्यवस्था कैना नीति डेहल बा । पशु विकासओर छाडा पशुचौपयामे भ्याक्सिनेशन, पशुके नस्ल सुधार, पशु विमा लगायतके कार्यक्रम समेटल बा । पर्यटन विकासओर कैलाली नाला, सुकुटी नाला, मोहना नदी किनारमे साईकल ट्रयाक निर्माण कैना, धनगढीके पर्यटकीय स्थल जोरना कोरिडोर तयार पर्ना, धनगढीके तालतलैयाके विकास, संरक्षण तथा पर्यटन प्रवद्र्धनके लाग काम कैना, भादागाउँ होमस्टेके पवद्र्धन कैना लगायतके कार्यक्रम रहल बा ।
ओस्टेक करके सामाजिक विकासओर वालबालिका किशोर किशोरीसंग उप–मेयर कार्यक्रम, मेयर, उपमेयर कल्याणकारी छात्रबृति, उत्कृष्ठ शिक्षक सम्मान, बालविकास शिक्षक, सामुदायिक सिकाई केन्द्रके कर्मचारीहे केन्द्रसे तोकल तलवमे अपुग रकम थप कैना नीति लेहल बा । ओस्टेक करके, पूर्वाधार, स्वास्थ्य, सुशासन तथा संस्थागत विकास, कानूनी मामिला तथा न्यायिक निरुपण लगायतके क्षेत्रहे समेट्न करके नीति तर्जुमा करले बा ।
नगरप्रमुख नृपबहादुर वड सीमित श्रोत साधनके बिच सक्कु क्षेत्रहे समेटके नीति, कार्यक्रम तथा बजेट नानल बटैलै । उहाँ कहलै, ‘हम्रे छलफले बाटी समेटे नइसेकल विषय समेटके लैजैबी । धनगढी उप–महानगरपालिकाके उप–प्रमुख सुशिला मिश्र भट्ट बहुट मेहनतके साथ स्थानीय तहसे अवलम्वन कैना सक्कु प्रकृया पुरा करके, नगरवासीके मागहे श्रोत साधनसे भ्याइटसम समेट्न प्रयत्न करल बटैली । उहाँ कहली, नीति, कार्यक्रम ओ बजेट तयार पर्नामे सहयोग कैना सक्कुहुनहे धन्यवाद डेहे चाहठी ।
धनगढी उप–महानगरपालिकाके प्रमुख प्रशासकीय अधिकृत तथा नगरसभाके सदस्य सचिव हरिबहादुर चन्द बार्षिक नीति, कार्यक्रम तथा बजेट उप्परके छलफल जारी रहल बटैलै ।
