सेती प्रादेशिक अस्पतालमे कोरोनासे मुवुइयाके संख्या न्यून
पहुरा समाचरदाता
धनगढी, १४ असार । सेती प्रादेशिक अस्पतालमे पछिल्का २४ घण्टामे कोरोनासे मुउइयाके संख्या न्यून रहल जनागिल बा ।
सेती प्रादेशिक अस्पताल धनगढीके सूचना अधिकारी दिलिपकुमार श्रेष्ठके अनुसार अब्बे १५ जाने केल कोरोना संक्रमित उपचार करैटी बटै, कलेसे ३ जाने लौवा विमारी भर्ना हुइल बटै । हालसम अस्पतालमे भर्ना हुइल संख्या १२ सय ५४ हुइलमे ठिक हुके गैल ओ होम आइशोलेशनमे रहल संख्या १ हजार ५९ जाने रहल बटै । मृत्यू हुइल संख्या १ सय ८० रहल बा ।
पछिल्का २४ घण्टामे ठिक हुके गैल ओ होम आइशोलेशनमे रहल संख्या ६ रहल सूचना अधिकारी श्रेष्ठ जनैलै । अब्बेसम ५ जाने आइसियूमे, २ जाने भेन्टिलेटरमे रहल बटै । सेती प्रादेशिक अस्पतालमे अभिनसम १ लाख ६ हजार ४ सय ७० जानेक पिसिआर स्वाव संकलन करलमे निगेटिभ हुइल संख्या ८७ हजार ६ सय २३ ओ पोजेटिभ संख्या १८ हजार ८ सय ४७ रहल बा ।
पछिल्का २४ घण्टामे ८४ जानेक पिसिआर स्वाव संकलन करके जाँच करलमे ६६ जानेक निगेटिभ ओ १८ जानेक पोजेटिभ रिपोर्ट आइल बा । हालसम ३२० जानेक एन्टिजेन जाँच करलमे १७० जानेक पोजेटिभ ओ १५० जानेक रिपोर्ट निगेटिभ आइल सेती प्रादेशिक अस्पताल धनगढी जनैले बा ।
सेती प्रादेशिक अस्पतालमे जनरल बेड १९, आइसियू वेड १६, एचडियू वेड ५५, इमरजेन्सी वेड ४५ रहल बा ।
