मानव अधिकारके अवस्था सुधारउन्मुख नइहो

पहुरा समाचारदाता
धनगढी,१५ असार । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेशके प्रदेश संयोजक खडकराज जोशी मानव अधिकारके अवस्थामे सुधार आइनइसेकल बटैले बटै ।

मानव अधिकारके सवालमे संचारकर्मीसंग आज कैगिल समन्वय बैठकमे उहाँ जनवरीसे अब्बे २ सय ६२ ठो घटना घटल बटैलै । उहाँ कहलै, ६ महिनाके अवधिमे टमान मेरिक अटरा ढेर घटना घटल बा, यकर अवस्था हेरलेसे मानवअधिकार घटनामे सुधार नइपिल्गाइठ । सरकारके नीति मजा रहलेसेफे कार्यक्रम नइमजा रहल संयोजक बटैलै ।

ओस्टेक कोभिड–१९ के दुसर चरणके प्रभाव, संचारमाध्यम, संचारकर्मीके अवस्थाबारे छलफल हुइल रहे । प्रदेश संयोजक जोशी संचारकर्मीनहे मानवअधिकारमैत्रीके दृष्टिसे कलम चलैना आग्रह करलै । बैठकमे नेपाल पत्रकार महासंघ कैलालीके अध्यक्ष हिमालय जोशी, महासंघके प्रदेश सचिव हरि जोशी ओ महासंघ कैलालीके सचिव प्रेम चौधरी कोरोनाके दुसरा चरणमे संचारकर्मीसे भोगल समस्या ओ अब्बेक अवस्थाबारे अपन बाट धारल रहिट । बैठकमे इन्सेकके कार्यक्रम अधिकृत परिस्कृत पौडैल, प्रलेख अधिकृत कृष्ण विक लगायत संचारकर्मीनके उपस्थिति रहे ।