कैलारी गाउँपालिकाके बजेट सर्वसम्मतिसे पारित
पहुरा समाचारदाता
हसुलिया, १५ असार । कैलालीके कैलारी गाउँपालिका आर्थिक वर्ष २०७८÷७९ के लाग गाउँ सभामे पेस करल बजेट, नीति तथा कार्यक्रम सर्वसम्मतिसे पारित हुइल बा ।
मंगरके बैठल गाउँ सभा बैठकसे अइना आर्थिक वर्षके बजेट, नीति तथा कार्यक्रम सर्वसम्मतिसे पारित करल हो । असार १० गतेके गाउँ सभामे गाउँपालिकाके उपाध्यक्ष लक्ष्मी सत्गौवा आर्थिक वर्ष २०७८÷७९ के लाग ६३ करोड पाँच लाख २५ हजार रुपैयाँके बजेट प्रस्तुत करल रहिट । ओस्टेक, गाउँपालिकाके अध्यक्ष लाजुराम चौधरी नीति तथा कार्यक्रम प्रस्तुत करले रहिट । आजके गाउँ सभा बैठकसे ताली बजाके बजेट, नीति तथा कार्यक्रमहे सर्वसम्मतसे पारित करल गाउँपालिकाके प्रवक्ता कमलप्रसाद चौधरी जानकारी डेलै ।
कैलारी गाउँपालिकासे विषयगत समितिओर पूर्वाधार विकास ओ सामाजिक विकासमे सबसे ढेर तीन÷तीन करोड रुपैयाँ बजेट विनियोजन करले बा । ओस्टेक आर्थिक विकासओर दुई करोड २५ लाख, वन तथा विपद व्यवस्थापनमे दुई करोड रुपैयाँ बजेट विनियोजन करले बा । ओस्टेक सुशासन तथा संस्थागत विकासमे ३० लाख रुपैयाँ बजेट विनियोजन करल बा ।
उपाध्यक्ष लक्ष्मी सत्गौवाके अध्यक्षतामे बैठल बैठकमे गाउँपालिकाके अध्यक्ष लाजुराम चौधरी विशेष सम्बोधन करले रहिट । उहाँ, बजेट, नीति तथा कार्यक्रममे उठल विषयमे प्रष्ट पारल रहिट । ओस्टेक, बैठकमे भौतिक पूर्वाधार विकास समिति संयोजक कमलप्रसाद चौधरी, आर्थिक विकास समिति संयोजक कैलाश चौधरी, वन तथा वातावरण ओ विपद् व्यवस्थापन समितिके संयोजक विष्णु चौधरी ओ सामाजिक विकास समितिके संयोजक भागरथी चौधरी बोलल रहिट । बैठकमे गाउँ सभा सदस्य, गाउँपालिकाके प्रमुख प्रशासकीय अधिकृत खगेन्द्रराज जोशी, गाउँपालिकाके कर्मचारीके उपस्थिति रहल रहे ।
