निम्दी अस्थायी कोभिड अस्पताल

प्रेमलाल चौधरी
निम्दी (दरख), १६ असार । अस्पतालके कोरोना विरामीके लाग बनाइल १० ठो शैय्यामे ९ ठो खाली बा । अक्सिजनसे भरल सिलिन्डर एक पाँजर ढरल बा । एक घचिमे चिकित्सक लोग अइठैं, उहाँ रहल एकठो बिरम्हियाहे हेर्ठै । कैसिन बा अवस्था पुछ्ठै ओ फेन अपन अफिस ओर लग्ठैं । यि दृष्य हो, घोडाघोडी नगरपालिलका वडा नम्बर ३, निम्दीस्थित अस्थायी कोभिड अस्पतालके ।

असार ७ गते अस्थायी कोभिड अस्पतालमे एक जाने कोरोना संक्रमित उपचाररत रहैं । उहाँक् फेन डोसर रोज डिस्जार्च हुइना रहिन् । नेपालमे डोसर चरणके कोरोना भाइरसके संक्रमण घटलसँगे कैलालीके घोडाघोडी नगरपालिकामे फेन कोरोनो संक्रमण दर घटल बा । जेठ २ गतेसे सञ्चालनमे आइल १० शैय्याके उ अस्पतालमे असारके पहिल अठ्वारमे एकजाने किल संक्रमितके उपचार हुइटेहे, यहाँ ।

अस्पतालके इञ्चार्ज डा टेकराज जोशीके अनुसार अस्पताल सुरु हुइलसे असार ७ गतेसम कोरोना भाइरसके शंका रहल १ सय २९ जनहके एन्टिजिन विधिसे परिक्षण करलमे ५८ जहनमे संक्रमण पुष्टि हुइल रहे । पुष्टि हुइल मनसे अवस्था हेरके १४ जहनहे अस्पतालमे भर्ना करल डा जोशी बटैलैं । उहाँ कलैं, ‘अस्पताल खुलल् १ महिनामे एन्टिजेन विधिसे परिक्षण करलहुकन अवस्था हेरके १४ जहन अस्पतालमे भर्ना करके उपचार करली । ओ, उपचारमे रहल ५ जहनमे ज्याडा समस्या डेखाइल ओरसे उहाँ हुकनहे अन्य ठाउँमे रिफर करले रही ।’

उहाँक अनुसार रिफर करलमन्से ४ जहनके उपचारके क्रममे मृत्यु हुइल रहे । ‘अक्सिजनके मात्रा एकडम कम हुके अक्सिजन डेलेसे फेन अक्सिजनके मात्रा पूरा हुइ नैसेकल बिरामीहे रिफर करे परल,’ उहाँ कलैं, ‘हम्रे यहाँसे अवस्था हेरके कुछ विरामीहे धनगढीस्थित सेती प्रादेशिक अस्पताल पठैली कलेसे कुछहे भेरी अस्पताल बठैले रही ।’ ‘कुछ बिरामी रिफर करके फेन बचाइ नैसेक्ली,’ उहाँ कलैं ।

अस्टेक, डा जोशीके अनुसार स्वास्थ्यमे ढेर समस्या नैरहल ४४ जाने कोरोना पोजेटिभ आइल बिरामीन्हे होम आइसोलेशनमे पठाइल बटैलैं । ‘जेकर अक्सिजन मात्रा ठिक बा, औषधि डेलेसे किल स्वास्थ्यमे सुधार डेखाइलहुकनहे होम आइसोलेशनमे पठैली ।’ उहाँ कलैं, ‘पोजेटिभ डेखाइलहुक्रे अस्पताल आके फेन औषधि लैजिठै कलेसे अस्पताल आइ नैसेकलहुकनहे फोनमार्फत फेन परामर्श डेटी आइल बटी,’ डा जोशी आगे कलैं, ‘होम आइसोलेशनमे बैठल बिरामीहुकनहे हम्रे अस्पतालसे फेन फोन करके बिरामीके अवस्थाबारे बुझ्ठी ।’

अस्थायी कोभिड अस्पतालमे आपन गोसियाहे उपचारके लाग नानल लहानी (नाम परिवर्तन) उपचारमे मजा हेरचाह हुइल बटैली । उहाँ कली, ‘यहाँक् डाक्टर ओ नर्सहुक्रे समय समयमे हेरचाह करडेठैं ।’ ‘अब्बे अस्पतालमे अक्के जाने रहल ओरसे फेन हुइ, उपचार सेवामे खास समस्या नैहो,’ उहाँ कली, ‘मने बिरम्हियाके लाग कुछ दवाइ भर बाहेरसे नानेक परठ ।’

हुकान गोसियाहे जेठ २८ गते कोरोना परिक्षणमे पोजेटिभ रिपोर्ट आइल डा जोशी जानकारी डेलैं । डा जोशी कलैं, ‘उहाँके केशमे सुरुमे स्वास्थ्यमे समस्या नैडेखाइल ओरसे घरे पठैले रहि, मने हुकान स्वास्थ्यमे समस्या बह्रल बाद असार १ गते उहाँहे फेनसे अस्पतालके आइसोलेशनमे ढरके उपचार सुरु करली । अब्बे उहाँके स्वास्थ्यमे क्रमिक रुपमे सुधार हुइटी बा ।’ ‘यहाँ आइल बिरामीहुकनहे सेकटसम अस्पतालसे निःशुल्क औषधि उपलब्ध करैठि,’ डा जोशी कलैं, ‘कोरोना बिरामीहुकनहे शरीरमे डेखाइल लक्षण अन्सार औषधि डेहेक परठ । कौनो औषधि यहाँ अस्पतालमे नैरहे सेकठ । उ नैरहल औषधि बाहेरसे नाने कहे परठ ।’ उहाँ कलैं, ‘हमारठन रहल औषधि हम्रे निःशुल्क डेले बटि, मने अवस्था अनुसार चलाइ परना ओ हमारठन नैरहल औषधिभर खरिद करे परठ बिरह्मियन ।’

घोडाघोडी नगरपालिकाके नगरप्रमुख ममताप्रसाद चौधरी नगरपालिकामे रहल कोरोना बिरामीन्हे नगरपालिकासे लागल पुगलसम उपचार करी कहिके अस्थायी कोभिड अस्पतालके स्थापना करल बटैलैं । उहाँ कलैं, ‘अस्पतालके सञ्चालनके लाग एक जाने एमबीबीएस डाक्टरलगायत नर्सहुकनके व्यवस्था करले बटि ।’ यहाँ उपचारमे आइल बिरामीहुकनहे निःशुल्क औषधि, खानासहितके व्यवस्था करल बटैलैं ।

अस्टेक, भेन्टिलेटरमे ढारे परना बिरामीहुकनहे भर निःशुल्क एम्बुलेन्स मार्फट रिफर करल बटैलैं । ‘यी अस्पतालमे अक्सिजन डेके उपचार हुइ सेक्नाहे भर्ना करके उपचार करली,’ उहाँ कलैं, ‘भेन्टिलेटरमे ढरे परना बिरामीहे भर अवस्था हेरके किहु धनगढी नै टे नेपालजंग पठैली । बाँकी यहैं उपचार हुइ सेक्ना, जिहिन अक्सिजन चाही, जेकर उपचार करे सेक्ना मेरिक बा, उहाँ हुकन उपचार करके ठिक करैली ।’

नगरप्रमुख चौधरीके अनुसार नगरपालिकाके आर्थिक वर्ष २०७८/०७९ के तेह्रौं नगरसभासे ६० लाख रुप्या कोभिड–१९ व्यवस्थापनके भुक्तानीके लाग छुट्याइल बटैलैं । अस्पतालके भवन निर्माणमे १० लाख, ल्याब, अफिसलगायत अन्य मर्मतके लाग ५ लाख खर्चके साथ कर्मचारी व्यवस्थापन, बिरामीहुकनके लाग औषधि खाना, अक्सिजन खरिद, पीपीई, सेनिटाइजर, मास्क, पन्जालगायतमे ६० लाखसम खर्च आइल उहाँ बटैलैं । उहाँ स्वास्थ्य सामग्री खरिदके आकुर बिल नैआइल ओरसे सक्कु खर्च विवरण नैरहल बटैलैं ।

नगरप्रमुख आगे कलैं, ‘अब्बे नगरपालिकासे सञ्चालन करल अस्थायी कोभिड अस्पतालमे अक्सिजनके अभाव नैहो ।’ अस्टेक, तेह्रौं नगरसभासे स्वास्थ्य क्षेत्रमे ३ करोड बजेट बाडफाड करल जानकारी डेलैं । यिहे स्वास्थ्य क्षेत्रके बजेट अइना बरसमे फेन कोभिड–१९ के व्यवस्थापनमे खर्च हुइना उहाँ बटैलैं ।

अस्टेक, अक्सिजन लगायत डाक्टरके व्यवस्थापन समयमे नैहुइल ओरसे अस्पताल सञ्चालनमे ढिल हुइल उहाँ बटैलैं । उहाँ कलैं, ‘हम्रे मेडिकल अफिसरहे करारमे ढरके जेठसे अस्पताल सुरु करली ।’ अस्पताल सुरु हुइलपाछे टमान नागरिकहुक्रे नगरपालिका बह्रिया काम करल कना प्रतिक्रिया आइल बा ।’ उहाँ कलैं, ‘उपचारके लाग सोझे धनगढी जाइ परना नागरिकके लाग गाउँमे चिकित्सकसहितके कोभिड अस्पताल सञ्चालन हुके सहज हुइल स्थानीयहुकनके प्रतिक्रिया पैले बटि ।’

नगरप्रमुख चौधरी महामारीके समयमे पालिकासे स्वास्थ्य क्षेत्रमे अपन ध्यान केन्द्रित करल बटैलैं । अब्बे पालिका हरेक वडामे स्वास्थ्य केन्द्र बनैना, नगरमे रहल आम नागरिकहुकनके कोरोना परीक्षण करे पैना व्यवस्था ओ सेकटसम उपचारके व्यवस्था करल उहाँ जनैलैं ।

घोडाघोडी नगरपालिकाके स्वास्थ्य शाखाके जनस्वास्थ्य अधिकृत कैलाशकुमार रावत नगरपालिकामे अब्बे कोरोनो संक्रमण दर कम हुइल बटैलैं । उहाँक् अनुसार बैशाख ओ जेठमे संक्रमितके संख्या बह्रल रहे, मने असार लागल बाद नगरमे संक्रमितके संख्या कम हुइल बा । उहाँ नगरमे रहल कोइ फेन संक्रमणसे स्वास्थ्यमे समस्या हुइलसे घोडाघोडी–३, निम्दीस्थित कोभिड अस्पतालमे निःशुल्क उपचारके लाग आइना आग्रह करलैं ।

जनस्वास्थ्य अधिकृत रावत कलैं, ‘केक्रो जुरी आइगिल, डट्के खोँखी लागे लागल, स्वासप्रस्वासमे समस्या आइल कलेसे निम्दीस्थित कोभिड अस्पतालमे निःशुल्क उपचार हुइठ । यहाँ आके उपचार कराइ सेक्ठी ।’ अस्टेक, नगरपालिकामे हप्ताके दुई दिन पीसीआर परिक्षणके लाग स्वाब फेन संकलन हुइना उहाँ बटैलैं । उहाँक् अनुसार घोडाघोडी नगरपालिकामे प्रत्येक हप्ताके अँट्वारके रोज दरखमे ओ बुधके रोज पहलमानपुरमे पीसीआर परिक्षणके लाग स्वाब संकलन हुइठ । उ स्वाब संकलन करके धनगढीस्थित सेती प्रादेशिक अस्पतालमे परिक्षणके लाग पठाजैना जनस्वास्थ्य अधिकृत रावत बटैलैं ।

जनस्वास्थ्य अधिकृत रावतके अन्सार कोरोना पोजेटिभ डेखाइल, मने स्वास्थ्यमे समस्या नैरहलहुक्रे होम आइसोलेशनमे बैठल बटैं । उहाँ होम आइसोलेशनमे रहल व्यक्तिहुकनहे अलग्गे कोठामे रना, चर्पि फेन अल्गे बेल्सना, औरे जहनसे डुर रहना आग्रह फेन करल बटैलैं । जनस्वास्थ्य अधिकृत रावत स्वास्थ्यमे समस्या नैरहलहुकन १४ दिनसम होम आइसोलेशनमे बैठ्ना आग्रह करलैं ।

जनस्वास्थ्य अधिकृत रावतके अनुसार घोडाघोडी नगरपालिकामे असार पहिल अठ्वारसम २ सय ४२ जहनमे कोरोना संक्रमित पुष्टि हुइल बा । नगरपालिकामे हालसम ७ सय ४ जहनके एन्टिजिन विधिसे परिक्षण करलमे १ सय ४८ जाने ओ ५ सय ९९ जहनके पीसीआर विधिसे परिक्षण करलमे ९४ करके २ सय ४२ जाने कोरोना संक्रमित पुष्टि हुइल रहे । उहाँक अनुसार नगरपालिकामे कोरोना संक्रमणसे २६ जहनके ज्यान गइल बा ।

१० सैय्याके यी अस्पतालमे १५ ठो छोट ओ ८० ठो भारी (४० केजी)के अक्सिजनके सिलिन्डर बा । अस्टेक, उ अस्थायी कोभिड अस्पतालमे लक्षण डेखाइल व्यक्ति चाहे जब आके एन्टिजेन विधिसे परिक्षण करे सेक्ना व्यवस्था बा कलेसे, पीसीआर परिक्षणके लाग स्वाब संकलन करके परिक्षणके लाग धनगढी पठा जाइठ ।