श्रम स्वीकृति लेके वैदेशिक रोजगारमे जउइया ५६ लाख नघलै

पहुरा समाचारदाता
धनगढी, १९ असार । नेपालसे श्रम स्वीकृति लेके बैदेशिक रोजगारीमे जउइयाके संख्या ५६ लाख नाघल जनागिल बा ।

सुरक्षित आप्रवासन परियोजना (सामी) अन्र्तगत धनगढी उपमहानगरपालिका ओ ट्रेस प्रालिके सहकार्यमे शुकके रोज धनगढीमे एक कार्यक्रममे नेपाल श्रम अप्रवासन प्रतिवेदन २०२० अनुसार नेपालसे श्रम स्वीकृति लेके बैदेशिक रोजगारीमे जउइयाके संख्या ५६ लाख नाघल जनागिल हो ।

सुरक्षित अप्रवासन सामीके कार्यक्रम अधिकृत लक्ष्मी चौधरीसे डेहल जानकारी अनुसार आर्थिक बर्ष २०७६/०७७ सालमे १ लाख ९० हजार ४ सय ५३ जाने बैदेशिक रोजगारमे गैल रहिट । जेम्ने महिला १८ हजार २०६ जाने ओ पुरुष १ लाख १७ हजार २४४ जाने रहल रहिट । आर्थिक बर्ष २०७५÷७६ सालमे २ लाख ३६ हजार २११, आर्थिक बर्ष २०७४÷७५ सालमे ३ लाख ५४ हजार ८२ जाने रोजगारमे गैल रहिट । कोभिड–१९ संक्रमण विश्वभर फैलल कारण अब्बे पहिले तुलनामे कुछ कमी हुइल विल्गाइल बा ।

कार्यक्रम अधिकृत लक्ष्मी चौधरीके अनुुसार कैलाली जिल्लासे गैल बरसके सावनसे चैत मसान्तसम बैदेशिक रोजगारीके क्रममे समस्यामे परल ४९ ठो घटना एमआरसीमे दर्ता हुइल बा । उ घटना मन्से मृत्यू ह्ुइल ४ ठो, लकडाउनके अवस्थामे भीस म्याद ओराइल १२ ठो, विमारी १ ठो, ठगी ५ ठो, जेल ३ ठो, हेराइल ११ ठो, कागजपत्र समस्या ८ ठो, काम ओ तलब नइपाइल ५ ठो करके ४९ ठो घटना दर्ता हुइल उहाँ जनैली ।

सुरक्षित आप्रवासन परियोजना (सामी) अन्र्तगत ट्रेस नेपालके परियोजना संयोजक टेक बहादुर बलायर प्रतिवर्ष ४ लाख ५० हजार श्रमशक्ति आन्तरिक श्रमबजारमे प्रवेश हुइटी रहल बटैलै ।
सीमित रोजगारीके अवसर, न्यून आर्थिक बृद्धिदर ओ उच्च गरिबीके, कारण नेपालीहुक्रे बैदेशिक रोजगारप्रति आर्कषित हुइटी रहल उहाँ जनैलै ।

कोभिड–१९ महामारी आघे दैनिक १ हजार १२ सयसम नेपाली वैदेशिक रोजगारीके क्रममे स्वदेश छिरल बटैलै । सुरक्षित आप्रवासन परियोजना (सामी) अन्र्तगत धनगढी उपमहानगरपालिका ओ ट्रेस प्रालिके सहकार्यमे कैलालीके ४ स्थानीय तह धनगढी उपमहानगरपालिका, टीकापुर नगरपालिका, घोडाघोडी नगरपालिका ओ जानकी गाउँपालिकामे सूचनाके पहुँच, सीप तालिमके सहजीकरण, न्यायमे सहजीकरण, मनो सामाजिक परामर्शके सिफारिस ओ वित्तीय साक्षरता सम्बन्धी कार्यक्रम करटी परियोजना संयोजक बलायर बटैलै ।

कार्यक्रममे धनगढी उपमहानगरपालिकाके सामाजिक विकास अधिकृत टंक विष्ट सामी परियोजना बैदेशिक रोजगारमे जउइया ओ समस्यामे व्यक्तिके हितमे कार्य करल बटैलै । ओस्टेक कार्यक्रममे नेपाल पत्रकार महासंघ कैलालीके सभापति हिमालय जोशी, निवर्तमान अध्यक्ष जगत साउद परियोजनाके गतिविधि व्यापक बनैना मिडिया परिचालन करे पर्ना सुझाव डेहल रहिट ।