खोपके माग कैटी धर्नामे शिक्षक
पहुरा समाचारदाता
धनगढी, १९ असार । कैलालीमे कार्यरत शिक्षकहुक्रे आपनहे कोरोना विरुद्धके खोप लगैना माग करले बाटै ।
नियमित विद्यालय जाइबर अपनेहुक्रे फेन कोरोनाके जोखिममे रहल ओरसे खोप लगाइ पर्र्ना माग कैटी उहाँहुक्रे स्थानीय तहके कार्यालयमे धर्ना डेहल हुइट ।
धनगढीके धनगढी उच्च माविके प्राचार्य लक्ष्मणदत्त भट्ट विद्यार्थीके भीडमे जाइ पर्ना हुइल ओरसे शिक्षक कोरोना संक्रमणके उच्च जोखिममे रहल बटैलै । ‘शिक्षक, कर्मचारी ओ विद्यार्थीके भीडमे रहीके काम करे पर्ना हुइल ओरसे हम्रे फेन कोरोना संक्रमणके जोखिममे बाटी ।’ भट्ट कहलै, ‘ओहेमारे सरकारसे हमार लाग कोरोना विरुद्धके खोपके व्यवस्था करे परल ।’
सरकारसे राष्ट्रसेवक कर्मचारी ओ शिक्षकबीच खोपमे समेत विभेद करल औरे शिक्षक तीर्थराज पाण्डेय विद्यालय सञ्चालनके तयारी हुइटी रहल ओरसे शिक्षकहे कोरोना विरुद्धके खोप अनिवार्य रहल बटैलै ।‘आब विद्यालय नैखोलके नैहुइना अवस्था बा । ओहेमारे हम्रे जोखिममे बाटी ।’ पाण्डेय कहलै, ‘सरकारसे फ्रन्ट लाइनमे खटजैना कर्मचारीसरह व्यवहार कैके शिक्षकहे फेन खोप लगाइ परल ।’
सरकारसे शिक्षकहे राष्ट्रसेवक कर्मचारी सरह व्यवहार नैकरल शिक्षकहुक्रनके गुनासो रहल बाा । राष्ट्रसेवक कर्मचारी ओ शिक्षकहे डेजैना तलब भत्तामे फेन विभेद रहल पाण्डेय बटैलै । सरकारी कर्मचारी सरह तलबभत्ता, बीमा सुविधा, पर्यटन विदा डेहे पर्ना उहाँहुक्रनके माग रहल बा ।
नेपाल शिक्षक महासंघके अगुवाइमे सामुदायिक विद्यालयमे कार्यरत शिक्षकहुक्रे शुकके धनगढी उपमहानगरपालिका, गोदावरी नगरपालिकालगायत कैलालीके टमान स्थानीय तहमे धर्ना डेहल रहिट । इहीसे आघे उहाँहुक्रे खोपलगायतके माग कैटी स्थानीय ओ प्रदेश सरकारहे ज्ञापनपत्र समेत बुझैले रहिट ।
